لوگوں نے صحت مند ہونے کے بنیادی منتر کو اپنانے اور بیماری سے پاک زندگی کا عہد کیا
نئی دہلی؍؍جمعہ کو دسویں بین الاقوامی یوگا ڈے کے موقع پر پورے ملک میں جوش و خروش کے ساتھ یوگا منایا گیا اور ثقافتی-مذہبی حدود سے بالاتر ہو کر لوگوں نے یوگا کی مشق کرنے اور صحت مند ہونے کے بنیادی منتر کو اپنانے اور بیماری سے پاک زندگی کا عہد کیا۔
پارلیمنٹ ہاؤس کے احاطے میں لوک سبھا اسپیکر اوم برلا کی قیادت میں یوگا ڈے منایا گیا۔ بین الاقوامی یوگا ڈے کی مبارکباد پیش کرتے ہوئے مسٹر برلا نے کہا "آج یوگا پوری دنیا میں ایک تحریک ہے۔ پوری دنیا خوش قسمت ہے کہ ہمارے پاس یوگا کی شکل میں ایسی طاقت ہے جو ہمارے اندر توازن قائم کرتی ہے اور ہمیں کارآمد، فعال اور خود انحصار بناتی ہے۔ یوگا کو پوری دنیا میں پذیرائی مل رہی ہے اور یوگا لوگوں کی روزمرہ کی زندگی کا ایک اہم حصہ بن گیا ہے۔
دہلی میں صبح کئی مقامات پر یوگا مشقوں کا اہتمام کیا گیا جس میں ہزاروں لوگوں نے پورے جوش و خروش کے ساتھ حصہ لیا۔آیوش کی مرکزی وزارت نے نئی دہلی میونسپل کونسل، دہلی ڈیولپمنٹ اتھارٹی اور آرکیالوجیکل سروے آف انڈیا کے ساتھ یوگا پریکٹس کے لیے ایک معاہدے پر دستخط کیے تھے۔نائب صدر جمہوریہ جگدیپ دھنکڑ نے صبح یوگا کی مشق کی اور لوگوں کے لیے نیک خواہشات کا یوگا پیغام دیا۔ مرکزی وزیر ثقافت گجیندر سنگھ شیخاوت، زراعت اور کسانوں کی بہبود کے وزیر شیوراج سنگھ چوہان، صحت و خاندانی بہبود کے وزیر جگت پرکاش نڈا اور دیگر رہنماؤں نے مختلف مقامات پر یوگا پروگراموں کی قیادت کی۔
وزیر اعظم نریندر مودی نے مرکز کے زیر انتظام جموں و کشمیر کے دارالحکومت سری نگر میں خصوصی طور پر ایک یوگا کیمپ کی قیادت کی اور یوم یوگا پر ملک اور دنیا کے لوگوں کو مبارکباد اور نیک خواہشات پیش کیں۔اس موقع پر مسٹر مودی نے کہا کہ اقوام متحدہ کی جانب سے بین الاقوامی یوگا ڈے منانے کے فیصلے کے بعد گزشتہ ایک دہائی میں دنیا میں یوگا تیزی سے پھیل رہا ہے اور یوگا سے متعلق تاثرات بدل گئے ہیں۔ آج دنیا کے بڑے بڑے اداروں اور یونیورسٹیوں میں یوگا پر مطالعہ ہو رہا ہے اور تحقیقی مقالے شائع ہو رہے ہیں۔ لوگ اب محدود دائرہ کار سے باہر آ رہے ہیں۔ آج دنیا ایک نئی یوگا معیشت کو آگے بڑھتے ہوئے دیکھ رہی ہے۔ رشی کیش، کاشی سے لے کر کیرالہ تک، ہندوستان میں یوگا ٹورازم کا ایک نیا رجحان دیکھا جا رہا ہے۔ دنیا بھر سے سیاح ہندوستان آرہے ہیں کیونکہ وہ یہاں مستند یوگا سیکھنا چاہتے ہیں۔
مسٹر مودی نے کہا ’’بین الاقوامی یوم یوگا پر ہم کشمیر اور سری نگر کے ماحول میں اس توانائی اور طاقت کو محسوس کر رہے ہیں جو ہمیں یوگا سے ملتی ہے۔ میں کشمیر کی سرزمین سے یوگا ڈے پر ملک کے تمام لوگوں اور دنیا کے کونے کونے میں یوگا کرنے والوں کو مبارکباد پیش کرتا ہوں۔
قابل ذکر ہے کہ مسٹر مودی نے سال 2014 میں اقوام متحدہ میں بین الاقوامی یوگا ڈے کی تجویز پیش کی تھی۔ ہندوستان کی اس تجویز کی 177 ممالک نے تائید کی جو ایک ریکارڈ ہے۔جموں و کشمیر کے مرکز کے زیر انتظام علاقے میں واقع جموں ایئر فورس اسٹیشن پر جمعہ کو’’خود اور معاشرے کے لیے یوگا ‘‘ کے تھیم پر فضائیہ کے اہلکاروں کی طرف سے 10 واں بین الاقوامی یوگا ڈے منایا گیا۔ ایئر واریئرز، ڈی ایس سی اہلکاروں، ایم ای ایس اہلکاروں اور ان کے خاندان کے افراد نے ایئر فورس اسٹیشن کے سرسبز و شاداب میدان میں یوگا کی مشق کی۔
اتر پردیش کے متھرا میں فوج کی 01 کور میں فوجیوں کے ساتھ مختلف آسن اور سانس لینے کی مشقیں کرکے یوگا ڈے منایا گیا۔ وزیر دفاع راج ناتھ سنگھ نے آرمی چیف جنرل منوج پانڈے اور جنرل آفیسر کمانڈنگ، 01 کور کے لیفٹیننٹ جنرل سنجے مترا کے ساتھ سینئر افسران، فائر فائٹرز، خاندانوں اور بچوں کے ساتھ یہاں تقریب میں شرکت کی۔اس دن کو قوم کے لیے فخر کی بات بتاتے ہوئے مسٹر سنگھ نے کہا کہ یوگا جسمانی صحت، ذہنی سکون اور روحانی تندرستی کو فروغ دیتا ہے اور یہ جارحانہ صلاحیتوں کو بروئے کار لانے میں بھی مدد کرتا ہے جو کہ ملک کی حفاظت کرنے والے فوجیوں کے لیے ضروری ہے۔ انہوں نے کہا ’’ہر ہندوستانی فوجی ایک طرح سے یوگی ہے۔ دنیا نے ہمارے فوجیوں کی جسمانی اور ذہنی صحت کے ثبوت کئی بار دیکھے ہیں۔ ہمارے فوجیوں کی نہ صرف سرحدوں پر بلکہ قومی آفات کے دوران بھی خدمات ان کی مضبوط جسمانی اور ذہنی صحت کا منہ بولتا ثبوت ہے۔ جس طرح وہ منفی حالات میں غیر ضروری جارحیت سے بچتے ہیں اور جب بھی ضرورت پڑتی ہے ملک کی سالمیت اور خودمختاری کے تحفظ کے لیے جارحانہ انداز میں کھڑے ہوتے ہیں، اس سے یوگی کے طور پر ان کی شناخت کو تقویت ملتی ہے۔
اتر پردیش کے وزیر اعلی یوگی آدتیہ ناتھ نے جمعہ کو راج بھون کے صحن، لکھنؤ میں منعقدہ بڑے پیمانے پر یوگا مشق میں حصہ لیا اور یوگا کی مشق کی۔ ان کے ساتھ گورنر آنندی بین پٹیل نے بھی یوگا مشقوں میں حصہ لیا۔مدھیہ پردیش کے وزیر اعلیٰ ڈاکٹر موہن یادو نے آج دسویں بین الاقوامی یوگا ڈے کے موقع پر یوگا کی مشق کی۔وزیر اعلیٰ نے مدھیہ پردیش کی راجدھانی بھوپال میں وزیر اعلیٰ کی رہائش گاہ پر منعقدہ ‘ریاستی سطح کے یوگا پریکٹس’ پروگرام میں یوگا کی مشق کی۔ انہوں نے کہا "یوگا اپنے آپ کو خدا، روحانیت اور خوشی سے جوڑنے کا ایک طریقہ ہے۔ یوگا کا ہر آسن نہ صرف جسمانی توانائی بلکہ ذہنی طاقت بھی فراہم کرتا ہے۔ آئیے ہم سب یوگا کو زندگی کا لازمی حصہ بنانے کا عزم کریں۔ انہوں نے ریاست کے لوگوں پر زور دیا کہ وہ روزانہ یوگا کریں اور صحت مند رہیں، تاکہ وہ زندگی کے تمام مقاصد کو پورا کر سکیں۔
چھتیس گڑھ کے دارالحکومت رائے پور میں سائنس کالج کے میدان میں ریاستی سطح کے بڑے پیمانے پر یوگا پریکٹس میں وزیر اعلی وشنو دیو سائی کے ساتھ ہزاروں لوگوں نے یوگا کیا۔ اس موقع پر ریاستی کابینہ کی وزیر لکشمی راجواڑے، ممبر اسمبلی راجیش منات، گرو خوشونت صاحب اور انوج شرما بھی پروگرام میں موجود تھے۔
