فوجیوں اور ان کے خاندانوں کو درپیش چیلنجز اور مشکلات بہت بڑی ہیں،پھربھی قوم کی خدمت کاجذبہ مزیدگہراہوگا
نئی دہلی؍؍اہم اپوزیشن پارٹی کانگریس کے اقتدار میں آنے پر اگنی ویر اسکیم کو منسوخ کرنے کے اعلان کے درمیان چیف آف ڈیفنس اسٹاف (سی ڈی ایس) جنرل انیل چوہان نے پیر کو کہا کہ اگنی ویر صرف ایک سپاہی نہیں بلکہ ملک کی خودمختاری کے محافظ بھی ہے۔ جنرل چوہان نے یہ بات کرناٹک کے بیلگاوی میں مراٹھا رجمنٹل سینٹر اور بیلگاوی کے ایئر مین ٹریننگ اسکول (اے ٹی ایس) میں زیر تربیت اگنی ویر سے خطاب کرتے ہوئے کہی۔ فوجی خدمات کے مقصد اور فوجی ڈھانچے میں اس کے اہم کردار پر روشنی ڈالتے ہوئے انہوں نے کہا کہ یہ قوم کے تئیں اگنی ویروں کے غیر معمولی فرض کا منہ بولتا ثبوت ہے۔
جنرل چوہان نے کہا کہ فوجیوں اور ان کے خاندانوں کو درپیش چیلنجز اور مشکلات بہت بڑی ہیں۔ انہوں نے یقین دلایا کہ چیلنجوں کے باوجود اگنی ویر اپنے سفر کو انتہائی فائدہ مند محسوس کریں گے اور ان کا ہر قدم ان کی زندگیوں کو آگے لے جائے گا۔ اس سے ان میں قوم کی خدمت کا شاندار جذبہ مزید گہرا ہو گا۔
لڑائیوں کے بدلتے ہوئے منظر نامے کا حوالہ دیتے ہوئے انہوں نے سائبر جنگ، مصنوعی ذہانت اور غیر متناسب خطرات کو شامل کرنے کے لیے مستقبل کے تنازعات کی پیچیدگی اور غیر متوقع ہونے پر روشنی ڈالی جو اب میدان جنگ کا ایک لازمی حصہ ہیں۔
سی ڈی ایس نے ایئر فورس کی اگنی ویروں کی ٹریننگ کے بارے میں اطلاعات حاصل کرنے کے لیے ٹریننگ انسٹی ٹیوٹ کا دورہ کیا۔ انہوں نے 2022 میں وزارت دفاع کی طرف سے متعارف کرائے گئے نظر ثانی شدہ انڈکشن پیٹرن کے مطابق تربیت حاصل کرنے والے اگنی ویر ٹرینیز کے تیسرے بیچ سے بات چیت کی۔ انہوں نے ان کی حوصلہ افزائی کی کہ وہ مستقبل کی جنگ کے چیلنجوں کا سامنا کرنے کے لیے تیار اور تکنیکی طور پر ماہر فوجی بننے کے لیے تربیت پر توجہ دیں۔
