پونچھ میں عوامی وفود اور بی جے پی لیڈروں سے ملاقات کی
لازوال ڈیسک
پونچھ؍؍وادی پیرپنجال کا دورہ جاری رکھتے ہوئے جموں و کشمیر وقف بورڈ کی چیئرپرسن ڈاکٹر سید درخشاں اندرابی نے آج سرنکوٹ، پونچھ میں واقع تکیہ بابا غلام شاہ بادشاہ دارالعلوم لسانہ اور رضا نگر ضلع حویلی میں حضرت فاطمہ الزہرا رضی اللہ عنہا گرلز ایجوکیشنل انسٹی ٹیوٹ کا دورہ کیا۔اس دوران انہوں نے وہاں کے طلباء سے بات چیت کی۔ ڈاکٹر اندرابی نے دونوں تعلیمی اداروں کے عملے اور انتظامیہ سے ملاقاتیں کیں۔ انہوں نے ان اداروں کے نصاب کو اپ ڈیٹ کرنے اور صلاحیت سازی کے دیگر اقدامات کو شامل کرنے کی ضرورت پر زور دیا۔انہوں نے کہا کہ ہمیں مذہبی تعلیم کے ساتھ ساتھ بچوں کو سائنسی تعلیم دینے کی ضرورت ہے۔ انہوں نے ان اداروں میں بچوں کو فراہم کی جانے والی سہولیات پر خوشی اور اطمینان کا اظہار کیا۔ ڈاکٹر درخشاں نے پونچھ اور سرنکوٹ میں کئی عوامی وفود سے ملاقات کی اور ان کے ساتھ موجودہ سیاسی اور سماجی مسائل پر تبادلہ خیال کیا۔ انہوں نے پونچھ میں بھارتیہ جنتا پارٹی کے ضلع دفتر کا بھی دورہ کیا اور پارٹی لیڈروں کے ساتھ میٹنگ کی۔
