ترنمول کانگریس بنگال میں اکیلے لوک سبھا الیکشن لڑے گی: ممتا بنرجی
ممتا کے بغیر انڈیا اتحاد کا تصور نہیں: کانگریس
ان کے بغیر اس اتحاد کی کوئی اہمیت نہیں ہے:جے رام رمیش
یواین آئی
کولکتہ/گوہاٹیترنمول کانگریس کی سپریمو اور مغربی بنگال کی وزیر اعلیٰ ممتا بنرجی نے بدھ کو اعلان کیا کہ ان کی پارٹی ریاست میں انڈیا اتحاد کا حصہ نہیں بنے گی اور آنے والے لوک سبھا انتخابات میں تنہا الیکشن لڑے گی۔محترمہ بنرجی نے وردھمان ضلع سے روانہ ہونے سے قبل نامہ نگاروں سے یہ بات کہی۔
انہوں نے کہاکہ ”ہمارا انڈیا اتحاد سے کوئی تعلق نہیں ہے اور ہم ریاست کی 42 لوک سبھا سیٹوں پر اپنی طاقت کے بل بوتے پر الیکشن لڑیں گے۔“انہوں نے کہا کہ میرا کانگریس سے کوئی تعلق نہیں ہے۔ ہم اکیلے لڑیں گے اور آل انڈیا سطح پر انتخابات کے بعد فیصلہ کریں گے۔ انہوں نے کہا کہ ترنمول کانگریس ریاست میں کانگریس کو دو سیٹیں دینا چاہتی تھی، لیکن وہ مزید سیٹیں چاہتی تھی، جو ان کی پارٹی کو قبول نہیں ہے۔
ترنمول کانگریس لیڈر نے جمعرات کو مغربی بنگال میں داخل ہونے والے کانگریس لیڈر راہل گاندھی اور ان کی ‘بھارت جوڑو نیائے یاترا’ پر بھی تنقید کی۔ انہوں نے کہاکہ ”ان کا مغربی بنگال کا دورہ کرنے کا منصوبہ ہے، لیکن ان کے پاس (کانگریس) کا ہمیں مطلع کرنے کا بھی خیال نہیں ہے۔“ انہوں نے یہ بھی کہا کہ کانگریس 300 سیٹوں تک الیکشن لڑ سکتی ہے اور دیگر پارٹیوں کو بھی الیکشن لڑنا چاہئے۔کانگریس نے بدھ کو کہا کہ ترنمول کانگریس کی لیڈر ممتا بنرجی انڈیا اتحاد کا ایک اہم حصہ ہیں اور ان کے بغیر اس اتحاد کی کوئی اہمیت نہیں ہے۔
کانگریس کے میڈیا انچارج جے رام رمیش نے آج آسام کے گوہاٹی میں ایک پریس کانفرنس میں ایک سوال کے جواب میں کہا ‘ممتا نے کہا کہ ہم بی جے پی کو شکست دینا چاہتے ہیں۔ ”ہم بی جے پی کو شکست دینے کے لیے کوئی قدم پیچھے نہیں چھوڑیں گے اور اسی جذبے کے ساتھ راہل گاندھی کی بھارت جوڑو نیا ئے یاترا مغربی بنگال میں داخل ہو رہی ہے۔“بھارت جوڑو نیا ئے یاترا سے متعلق محترمہ ممتا کے بیان پر انہوں نے کہا ”کچھ رکاوٹیں آتی رہتی ہیں، انہیں دور کیا جا رہا ہے۔
ترنمول کانگریس اور ممتا بنرجی انڈیا اتحاد کے بڑے لیڈر ہیں اور ان کے بغیر انڈیا اتحاد کا تصور نہیں کیا جاسکتا“۔مسٹر رمیش نے کہا”محترمہ بنرجی کے ساتھ بات چیت جاری ہے اور رکاوٹوں کا حل تلاش کیا جائے گا۔ محترمہ ممتا نے خود کہا ہے کہ بی جے پی کو شکست دینا انکی ذمہ داری ہے، ان کی ترجیح ہے اور اس کے لیے وہ جو کچھ بھی کرسکتی ہیں، وہ کریں گی۔ اسی جذبے کے ساتھ بھارت جوڑو نیا ئے یاترا بنگال میں داخل ہو رہی ہے۔ اتحاد میں جو بھی رکاوٹیں ہیں وہ بات چیت کے ذریعے دور کی جائیں گی اور انڈیا اتحاد ملک بھر میں مل کر کام کرے گا۔
مسٹر جے رام رمیش نے کہا ”ہم نظریات کی جنگ لڑ رہے ہیں اور کانگریس کا مقصد آنے والے عام انتخابات میں صرف بھارتیہ جنتا پارٹی ( بی جے پی ) کو شکست دینا ہے۔ آسام کے وزیراعلی ہمنتا بسوا سرما ایک نظریے کی علامت ہیں جس نے سماج کے مختلف طبقات کے ساتھ ناانصافی کی ہے۔ یہاں بسوا سرما کی قیادت میں کرپشن اپنے عروج پر ہے، اسی لیے مسٹر گاندھی وزیر اعلیٰ کے خلاف بول رہے ہیں۔ میں آسام کے وزیر اعلیٰ کا شکریہ ادا کرنا چاہتا ہوں جنہوں نے اپنی دھمکیوں کے ساتھ ہماری یاترا کی تشہیر کی۔ ہم ڈرنے والے نہیں ہیں۔ ہم پیچھے نہیں ہٹیں گے۔“انہوں نے کہا ”کل ’بھارت جوڑو نیا ئے یاترا‘ مغربی بنگال پہنچے گی اور 26-27 جنوری کو آرام کرنے کے بعد 28 جنوری کو یاترا مغربی بنگال میں شروع ہوگی۔
’بھارت جوڑو نیا ئے یاترا‘ 20 مارچ تک ختم ہونے کا امکان ہے اور 20 سے 23 مارچ کے درمیان ’بھارت جوڑو نیائے یاترا‘ ممبئی پہنچے گی اور اس کے بعد ہماری تنظیم انتخابی عمل میں شامل ہو جائے گی۔ کل راہل گاندھی جی نے انتخابی بگل بجایا ہے جو کہ 5 نیائے پر مبنی ہے۔اس دوران کانگریس لیڈر کنہیا کمار نے نئی دہلی میں پارٹی ہیڈکوارٹر میں ایک پریس کانفرنس میں کہا کہ’بھارت جوڑو نیا ئے یاترا‘ صرف ملک میں سماجی، اقتصادی اور سیاسی انصاف قائم کرنے کے لیے منعقد کی جا رہی ہے۔ موجودہ حالات میں ملک کے نوجوانوں کے لئے انصاف، بھاگیداری میں انصاف، خواتین کے لئے انصاف، کسان کے لئے انصاف اور مزدور کے لئے انصاف کی ضرورت ہے۔
انہوں نے کہا کہ ملک کی آبادی کی اکثریت ابھی تک انصاف تک مکمل رسائی سے باہر ہے۔ آج ملک میں بیروزگاری 45 برسوں میں سب سے زیادہ ہے، اس لیے یوتھ جسٹس کا مطلب نوجوانوں کو روزگار دینا ہے۔ لوگوں کی شرکت کو یقینی بنانا ہے، اس لیے شرکت کے ساتھ انصاف کی ضرورت ہے۔ خواتین کے انصاف کے ذریعے خواتین کے لیے ایک محفوظ اور خود مختار معاشرہ بنانا ہوگا، کسان انصاف کے ذریعے کسانوں کو ان کی فصلوں کی مناسب قیمت دینی ہوگی اور مزدور انصاف کے ذریعے مزدوروں کو مناسب دیہاڑی نہیں مل رہی ہے، کانگریس حکومت انہیں مناسب دیہاڑی فراہم کرے گی۔ انہوں نے کہا کہ ”بھارت جوڑو یاترا“ کے دوران حکومت نے کوئی رکاوٹ نہیں کھڑی کی تھی لیکن اس بار انصاف کی اس لڑائی میں غیر منصفانہ طاقتیں رکاوٹیں کھڑی کر رہی ہیں۔ جس کانگریس پارٹی نے انگریزوں کو شکست دی وہ ان کی توپوں سے نہیں ڈرتی تھی وہ رکاوٹوں سے کیسے ڈرے گی۔ ہم انصاف کے لیے لڑ رہے ہیں اور جو لوگ رکاوٹیں کھڑی کر رہے ہیں وہ انصاف کے غدار ہیں۔
