سیول انتظامیہ، پولیس انتظامیہ اور محکمہ موٹر وہیکل کی مشترکہ کاوشوں سے سڑک حادثات کو کم کرنے کی ہر ممکن کوشش جاری
بابر فاروق
کشتواڑ//روڈ سیفٹی بیداری کو بڑھانے کی ایک سرشار کوشش میں، محکمہ موٹر وہیکل کشتواڑ نے ہیلی پیڈ کشتواڑ میں ایک جامع بیداری پروگرام کا انعقاد کیا۔ منعقدہ تقریب میں ٹرانسپورٹ یونین کے صدر اور دیگر اسٹیک ہولڈرز سمیت دو سو سے زائد افراد نے شرکت کی، جس کا مقصد روڈ سیفٹی کو فروغ دینا تھا۔ڈی ٹی آئی ٹریفک نونیت اور اے آر ٹی او کشتواڑ محمد سلیم منہاس نے روڈ سیفٹی احتیاطی تدابیر پر عمل کرنے کی اہمیت پر زور دیتے ہوئے شرکاء کو قیمتی جانکاری فراہم کرنے میں اہم کردار ادا کیا۔اس موقع پر موٹر وہیکل انسپکٹر آزاد حسین، آل ٹرانسپورٹ ایسوسی ایشن کشتواڑ کے صدر بنسی لال شان کے علاوہ محکمہ موٹر وہیکل کشتواڑ کا عملہ بھی موجود رہا۔ منعقدہ پروگرام ایک ماہ طویل قومی روڈ سیفٹی ماہ 2024 کا حصہ ہے، جو سڑک کے ذمہ دارانہ رویے کے کلچر کو فروغ دینے کے وسیع تر قومی اقدام کے ساتھ ہم آہنگ ہے۔ آگاہی مہم میں محفوظ ڈرائیونگ کے مختلف پہلوؤں پر روشنی ڈالی گئی اور ٹریفک قوانین کی غفلت سے یا جان بوجھ کر خلاف ورزی کے ممکنہ نتائج کو اْجاگر کیا۔ضلع انتظامیہ محکمہ موٹر وہیکل کے ساتھ مل کر مسلسل آگاہی اور تعلیم کے ذریعے محفوظ سڑک کا ماحول پیدا کرنے کے لیے پْرعزم ہے۔
