یواین آئی
نئی دہلی؍؍ مرکزی حکومت کی بڑی پردھان منتری وشوکرما یوجنا کے کل اندراج میں خواتین کی حصہ داری 55 فیصد تک پہنچ گئی ہے۔مرکزی وزارت بہت چھوٹی، چھوٹی اور درمیانے درجے کی صنعتوں میں ایڈیشنل ڈیولپمنٹ کمشنر ڈاکٹر اشیتا گنگولی ترپاٹھی نے ہریانہ کے سونی پت ضلع میں پردھان منتری وشوکرما یوجنا کے لیے بیداری مہم میں یہ جانکاری دی۔انہوں نے کہا کہ یہ سکیم 17 ستمبر کو شروع کی گئی تھی اور اس کے کل اندراج میں خواتین کی شرکت 55 فیصد ہے۔ انہوں نے ہر ایک سے درخواست کی کہ وہ خود کفیل بننے کے لیے اس اسکیم سے فائدہ اٹھائیں اور اپنے ادارے قائم کریں۔ڈاکٹر ترپاٹھی نے کہا کہ اس اسکیم کے تحت کاریگروں کو 15,000 روپے تک کی ٹول کٹس دی جائیں گی اور 3 لاکھ روپے تک کے قرضے بغیر ضمانت کے پانچ فیصد سود پر فراہم کیے جائیں گے۔ اس کے ساتھ روزانہ 500 روپے یومیہ الاؤنس، مفت ہنر مندی کی تربیت، مارکیٹنگ میں مدد، سرٹیفکیٹ اور کاریگروں کا شناختی کارڈ فراہم کیا جائے گا۔بدھ کو پی ایم وشوکرما یوجنا پر ایک بیداری پروگرام کا انعقاد کیا گیا۔ اس پروگرام کے دوران 10 اسٹالز لگائے گئے۔ پی ایم وشوکرما یوجنا کے تحت کاریگروں کے 18 مختلف زمروں جیسے بڑھئی، لوہار، سنار، کمہار، موچی، معمار، حجام، دھوبی، درزی کو موقع پر ہی رجسٹر کیا گیا اور پی ایم وشوکرما کے تحت ملنے والے فوائد کے بارے میں بتایا گیا۔
