کہاسرکاری محکموں کے پاس بقایا رقم کی فوری وصولی کی جائے اور اس کی منظوری کے لیے ٹھوس اقدامات کیے جائیں
لازوال ڈیسک
جموں//لیفٹیننٹ گورنر کے مشیر راجیو رائے بھٹناگر نے آج یہاں سول سیکرٹریٹ میں سیکوپ اور سڈکوکے بالترتیب 92 ویں اور 141 ویں بورڈ آف ڈائریکٹرز کی میٹنگ کی صدارت کی۔میٹنگ میں کمشنر سیکرٹری صنعت و تجارت وکرم جیت سنگھ نے شرکت کی۔ سیکرٹری ریونیو، پیوش سنگلا؛ منیجنگ ڈائریکٹرسڈکو ، سیکوپ، اندرجیت، ڈی جی، کوڈز، فیاض لون، ڈائریکٹر انڈسٹریز اینڈ کامرس کشمیر خالد مجید اور بورڈ کے دیگر ممبران ذاتی طور پر اور ویڈیو کانفرنسنگ کے ذریعے شرکت کی ۔جبکہ یہ میٹنگ جموں و کشمیر میں صنعتی ترقی اور اقتصادی ترقی سے متعلق اہم مسائل پر تبادلہ خیال اور غور و خوض کے مقصد سے منعقد کی گئی تھی۔ وہیںمیٹنگ نے بورڈ کو موجودہ منصوبوں کا جائزہ لینے، ان کے اثرات کا جائزہ لینے اور بڑھانے کے لیے شعبوں کی نشاندہی کرنے کا موقع بھی فراہم کیا۔سیکوپ کی میٹنگ کی صدارت کرتے ہوئے، مشیر بھٹناگر نے کارپوریشن کی انتظامیہ پر زور دیا کہ سرکاری محکموں کے پاس بقایا رقم کی فوری وصولی کی جائے اور اس کی منظوری کے لیے ٹھوس اقدامات کیے جائیں۔مشیر نے کارپوریشن کے افسران سے کہا کہ کارپوریشن کے عملے اور دیگر اثاثوں کا موثر استعمال کیا جائے اور کارپوریشن کی ترقی کے لیے عملے کے کردار کی از سر نو وضاحت کی جائے۔انہوں نے کارپوریشن حکام سے پرزور مطالبہ کیا کہ پراجیکٹ کی تکمیل کے لیے کنسلٹنٹس کی ضرورت کو ختم کیا جائے کیونکہ اس سے پروجیکٹوں پر عمل درآمد میں غیر ضروری تاخیر ہوتی ہے۔ انہوں نے ان سے کہا کہ وہ کسی بھی قسم کی مشاورت کے لیے محکمہ تعمیرات عامہ کے ڈیزائن ونگ کی خدمات سے استفادہ کریں۔ انہوں نے کارپوریشن کی انتظامیہ پر زور دیا کہ وہ اس بات کو یقینی بنائے کہ تمام ضروری ضروریات جیسے بجلی، پانی اور دیگر نئے ترقی یافتہ صنعتی اسٹیٹس میں پہلے سے ہی قائم ہو جائیں۔
