اجمیر، // آل انڈیا کانگریس کمیٹی کے قومی ترجمان اور راجستھان کے الیکشن انچارج اتل لوندے پاٹل نے کہا ہے کہ ملک میں مہنگائی کی وجہ سے عام آدمی پریشان ہے۔
مسٹر پاٹل آج یہاں صحافیوں سے بات کر رہے تھے۔ بھارتیہ جنتا پارٹی (بی جے پی) کے راجستھان میں اپنے منشور میں 450 روپے کا سلنڈر دینے کے معاملے پر مسٹر پاٹل نے پوچھا کہ مودی جی پورے ملک کے لیے 450 روپے کا ایل پی جی سلنڈر کب فراہم کریں گے۔ انہوں نے کہا کہ ڈبل انجن کی بنیاد پر عوام کو گمراہ کرنے والے مودی کو کم از کم ان ریاستوں میں ایسی ریلیف کا اعلان کرنا چاہئے جہاں شروع سے ہی ڈبل انجن کی حکومت چل رہی ہے۔
انہوں نے مسٹر مودی سے یہ بھی پوچھا کہ راجستھان کے مستقبل کے لئے ان کا کیا منصوبہ ہے؟
ریاست کی گہلوت حکومت نے منشور میں کسانوں، نوجوانوں، خواتین کی حفاظت، لاء اینڈ آرڈر، سیکورٹی اسکیم، تعلیم اور روزگار کے لیے 2030 کا ویژن دیا ہے۔
انہوں نے بی جے پی پر طنز کرتے ہوئے کہا کہ اس کے پاس کوئی ویژن نہیں ہے۔ 70 سال کا حساب مانگنے والے ساڑھے 9 سال کا حساب نہیں دے سکتے۔ جہاں بھی مودی اور بی جے پی عوام کو دھوکہ دے رہے ہیں وہیں کانگریس ان کے پیچھے کھڑی ہے۔ انہوں نے کہا کہ مودی نے لوک سبھا میں کسانوں کی شہادت پر راہل گاندھی کو خراج عقیدت پیش کرنے کی اجازت بھی نہیں دی، اس سے مودی کی سوچ ظاہر ہوتی ہے۔
مسٹر پاٹل نے کہا کہ اشوک گہلوت کی قیادت میں راجستھان کی کانگریس حکومت رپورٹ کارڈ کے ساتھ انتخابی میدان میں ہے، وہیں مدھیہ پردیش میں جہاں ڈبل انجن والی حکومت ہے، وہاں رپورٹ کارڈ کا کوئی نشان نہیں ہے۔
