بھدرواہ میں کارکنوں کے اجلاس سے تبادلہ خیال کیا،عوامی رابطہ پر دیا زور
لازوال ڈیسک
بھدرواہ؍؍ ڈیموکریٹک پروگریسو آزاد پارٹی کے چیئرمین غلام نبی آزاد نے منگل کے روز اس عزم کو دہرایا کہ ان کی سیاست مذہب سے پاک ہے اور صرف مفاد عامہ سے متعلق مسائل کو اجاگر کیا جاتا ہے۔ انہوں نے پارٹی کارکنوں سے کہا کہ وہ کبھی بھی ایسی سیاست میں ملوث نہ ہوں جو تفرقہ انگیز ہو اور فرقہ وارانہ معاملات بھڑک اٹھیں اور سماج کو تقسیم کرے۔انہوں نے کہاکہ ہمارا مقصد یہ یقینی بنانا ہے کہ ہم پرامن اور ترقی پذیر جموں و کشمیر کے لیے لوگوں کو اکٹھا کریں۔ انہوں نے مزید کہاکہ ہم تقسیم کی سیاست کرنے کے متحمل نہیں ہو سکتے کیونکہ ہماری پارٹی کی بنیاد انہی اصولوں پر ہے کہ ہر شخص کو یکساں رکھا جائے۔ انہوں نے بھدرواہ میں کارکنوں کے اجلاس سے تبادلہ خیال کرتے ہوئے کہاکہ سیاست ایسے لوگوں کی خدمت نہیں کر سکتی جس کا فرقہ وارانہ اور تفرقہ انگیز ایجنڈا ہو۔ آزاد نے کہا کہ بھدرواہ بالخصوص اور وادی چناب اپنی سیکولر اقدار اور بھائی چارے کے لیے مشہور ہے۔ انہوں نے کہا کہ یہ بھائی چارہ اور اتحاد لائق تحسین ہے اور لوگوں کو اسے ہر حال میں برقرار رکھنا چاہیے، چاہے کچھ بھی ہو۔ انہوں نے کارکنوں کے درمیان میٹنگز اور عوام تک رسائی پر زور دیا اور انہیں ہدایت کی کہ وہ کارنر میٹنگ کریں اور پارٹی کے ایجنڈے کو سب کے سامنے بیان کریں۔ آزاد نے کہاکہ ہمیں لوگوں تک پہنچنے اور انہیں اپنی پارٹی کے ایجنڈے کی وضاحت کرنے کی ضرورت ہے تاکہ زیادہ سے زیادہ لوگ ہمارے مشن میں شامل ہونے کے لیے تیار ہوں۔واضح رہے جلسہ عام میں جی ایم ایس سروڑی وائس چیئرمین، اعبدالمجید وانی جنرل سکریٹری، انیتا ٹھاکر جنرل سکریٹری، پی آر منہاس زونل صدر، آصف گٹو ضلع صدر، پربھا سلاتھیہ مہیلا صدر، سنیتا اروڑہ ترجمان و دیگران موجود تھے۔
