غزہ حملوں کی مذمت کی،کہادُنیامیں امن قائم کرنے کے ذمہ دارممالک جنگ مسلط کررہے ہیں
لازوال ڈیسک
سری نگر؍؍ جموں و کشمیر میں قبل از وقت انتخابات پر زور دیتے ہوئے ڈی پی اے پی چیئرمین غلام نبی آزاد نے غزہ پر حملوں کی مذمت کی۔ آزاد نے کہا کہ وہ ان تمام فلسطینیوں کے لیے دعا گو ہیں جنہوں نے وحشیانہ حملوں میں اپنی جانیں گنوائیں۔ انہوں نے کہا کہ میں غزہ میں معصوم شہریوں پر حملوں کی شدید مذمت کرتا ہوں۔ انہوں نے کہا کہ وہ ان تمام غیر مسلم اقوام کے شکر گزار ہیںجو دکھ کی اس گھڑی میں غزہ کے عوام کے ساتھ کھڑے ہوئے اور معصوم شہریوں پر حملوں کی مذمت کی۔ انہوں نے کہا کہ جب دنیا میں قیام امن کے ذمہ دار ممالک خود ہی معصوم شہریوں پر جنگ مسلط کرنے میں ملوث ہیں تو صرف اللہ ہی اس دنیا کو بچا سکتا ہے۔ آزاد نے بٹمالو سری نگر میں ایک ریلی سے خطاب تبادلہ خیال کرتے ہوئے ان حملوں کی مذمت کی۔ جموں و کشمیر کی سیاسی صورتحال کے بارے میں بات کرتے ہوئے، آزاد نے کہا کہ تقریباً تین دہائیوں میں یہ پہلی بار ہے کہ بٹمالو کے علاقے میں اس طرح کی سیاسی ریلی نکالی گئی۔ انہوں نے کہا کہ بٹمالو ایک انتہائی حساس علاقہ تھا اور عسکریت پسندوں اور سیکورٹی فورسز کے درمیان تصادم کا مقام تھا جس کی وجہ سے عام لوگ پریشانی کا شکار تھے۔ انہوں نے کہا، ’’مجھے خوشی ہے کہ جموں و کشمیر اور خاص طور پر ان انتہائی حساس علاقوں میں امن لوٹ آیا ہے جہاں عام لوگوں کو کافی نقصان اٹھانا پڑا ہے۔‘‘ آزاد نے کہا کہ جموں و کشمیر میں فوری انتخابات ہونے چاہئیں اور جموں وکشمیرکو انتظامی انتظامات میں چلانا ناقابل قبول ہے۔ انہوں نے کہا کہ کوئی بھی جمہوریت اس طریقہ کار کی اجازت نہیں دیتی کیونکہ صرف منتخب اراکین کو ہی لوگوں کی خواہشات اور امنگوں کی نمائندگی کا حق حاصل ہے۔ آزاد نے کہاکہ میں مرکز کے زیر انتظام علاقے میں موجودہ نظام پر سوال نہیں کر رہا ہوں اور نہ ہی میں یہ کہہ رہا ہوں کہ وہ کام نہیں کر رہے ہیں لیکن یہ ان کا کام نہیں ہے ،یہ منتخب اراکین کا کام ہے اور جمہوریتیں اسی طرح کام کرتی ہیں‘انہوں نے کہاکہ جموں کشمیر کی تاریخ میں یہ پہلی بار ہوا ہے کہ اتنے طویل عرصے تک انتخابات پٹری سے اترے۔ انہوں نے کہا کہ نو سال گزر چکے ہیں جب گزشتہ اسمبلی انتخابات ہوئے تھے۔ اس موقع پرعبدالمجید وانی جنرل سیکرٹری، سلمان نظامی ترجمان اعلیٰ ، حاجی مصدق نائب صدر صوبہ کشمیر، شفیق شبنم جنرل سیکرٹری ، بلال پیر زونل صدر، امیر بھٹ ضلع صدر، شفاعت غفار میر کارپوریٹر، نازیہ زرگر بھی موجود تھے۔
