حزب ِ اختلاف جماعتوں کے دھرنے میںاین سی پی ڈی پی قیادت کی عدم موجودگی پر اْٹھائے سوال
لازوال ڈیسک
سرینگر؍؍اپنی پارٹی صدر سید محمد الطاف بخاری نے بدھ کے روز سمبل میں اپنی پارٹی دفتر کا افتتاح کیا۔ اس موقع پر سنیئر نائب صدر غلام حسن میر، نائب صدر عثمان مجید، نائب صدر ظفر اقبال منہاس، ترجمان اور سابقہ ایم ایل اے یاور دلاور میر، ضلع صدر سرینگر نور محمد شیخ، ضلع صدر بانڈی پورہ کاظمی اور پارٹی لیڈر امتیاز پرے وغیرہ بھی موجود تھے۔اس موقع پر خطاب کرتے ہوئے الطاف بخاری نے پارٹی کی مضبوطی کے لئے عوامی رابطہ پروگراموں میں تیزی لانے پر پارٹی لیڈروں اور ورکروں کی ستائش کی۔ انہوں نے کہا’’ اپنی پارٹی سبھی خطوں کی سماجی، اقتصادی اور سیاسی ترقی کی وعدہ بند ہے‘‘۔ تقریب کے عاشیے کے دوران میڈیا افراد سے بات کرتے ہوئے انہوںنے جموں وکشمیر میں جمہوری نظام کی بحالی اور اسمبلی انتخابات منعقد کرنے کے مطالبات کو لیکر جموں میں 10اکتوبر کو حزب اختلاف سیاسی جماعتوں کے مشترکہ احتجاجی پروگرام سے نیشنل کانفرنس اور پی ڈی پی قیادت کی عدم موجودگی پر سوال اْٹھائے۔ایک سوال کے جواب میں انہوں نے کہا’’کشمیر میں بی جے پی کا کوئی وجود نہیں، اسی طرح نہ ہی کرگل میں، اسی لئے لداخ خود مختیار پہاڑی ترقیاتی کونسل کرگل الیکشن میں اْنہیں شکست کا سامنا کرنا پڑاہے۔ کونسل سرنو اس لئے منتخب ہوئی کیونکہ انہوں نے اچھا کام کیاتھا‘‘۔اْن کا مزید کہناتھاکہ کانگریس پارٹی، پیپلز ڈیموکریٹک پارٹی اور نیشنل کانفرنس بی جے پی کے نام پر عوام میں خوف پھلانے کے لئے ذمہ دار ہیں ، بی جے پی کا کشمیر میں کوئی وجود ہی نہیں، باوجود اِس کے جموں اور کشمیر میں یہ جماعتیں ووٹ بینک سیاست کھیل رہی ہیں۔انہوں نے کہاکہ اپنی پارٹی نے ریاستی درجے کی بحالی اور جموں وکشمیر میں اسمبلی انتخابات کرانے کا مطالبہ زور وشور سے اْجاگر کیا اور اس ضمن میں سلسلہ وار احتجاجی مظاہرے بھی کئے۔ الطاف بخاری نے کہا’’ جب کبھی بھی اسمبلی انتخابات کا اعلان ہوگا، اپنی پارٹی با اعتماد ہے کہ وہ جموں وکشمیر میں سب سے زیادہ نشستوں پر جیت حاصل کرے گی کیونکہ پارٹی کے ترقیاتی اور حقیقت پسندانہ ایجنڈے کو عملی پذیرائی حاصل ہے اور لوگوں کو ہم سے کافی اْمیدیں بھی وابستہ ہیں‘‘۔
