اسمارٹ میٹرز کا ٹھیکہ دینے کی وجہ سے بھاری بل آرہے ہیں تو بجلی کے پرائیویٹ ہونے کے بعد کیا ہوگا: امیت کپور
لازوال ڈیسک
جموں؍؍سمارٹ میٹرز کے خلاف تحریک چلانے والے ڈوگرہ ویلفیئر آرگنائزیشن کے صدر امیت کپور کو عوام کی جانب سے زبردست پذیرائی مل رہی ہے۔ اسی سلسلے میں آج ہری سنگھ پارک کے باہر امیت کپور کی قیادت میں خواتین سمیت بڑی تعداد میں لوگوں نے اسمارٹ میٹرز کے خلاف مظاہرہ کیا۔ اس دوران مظاہرین جے کے پی ڈی سی ایل اور ایل جی انتظامیہ کے خلاف نعرے لگا رہے تھے۔ انہوں نے اس معاملے پر خاموشی اختیار کرنے پر پی ایم او میں وزیر مملکت ڈاکٹر جتیندر سنگھ کے خلاف بھی نعرے لگائے۔ وہیںمظاہرین سے تبادلہ خیال کرتے ہوئے امیت کپور نے کہا کہ سمارٹ میٹر کا مسئلہ جموں و کشمیر میں گھریلو مسئلہ ہے اور جب تک سمارٹ میٹر ہٹائے نہیں جاتے ان کا احتجاج جاری رہے گا۔ انہوں نے کہا کہ اب تک صرف سمارٹ میٹر لگانے کا ٹھیکہ دیا گیا ہے اور جیسے ہی یہ میٹر لگتے ہیں عوام کو بھاری بل دئیے جا رہے ہیں، پھر جب بجلی پرائیویٹ ہو جائے گی تو عوام کا کیا حال ہو گا۔ انہوں نے کہا کہ اس وقت تمام اختیارات جے کے پی ڈی سی ایل کے پرنسپل سیکرٹری اور ایم ڈی کے پاس ہیں اور یہ دونوں باہر کے لوگ ہیں۔ پہلے تمام اختیارات پی ڈی ڈی کے چیف انجینئر کے پاس تھے لیکن اب ان سے تمام اختیارات چھین لیے گئے ہیں۔ کپور نے عوامی مفاد کے اس مسئلہ پر خاموشی برقرار رکھنے پر بی جے پی لیڈروں پر بھی حملہ کیا۔ انہوں نے عوام سے مطالبہ کیا کہ وہ اس مسئلے کے حوالے سے اپنے اپنے علاقوں میں احتجاج کریں اور اس مسئلے پر خاموش بیٹھے لیڈروں کو الیکشن میں سخت سبق سکھائیں۔ انہوں نے بی جے پی لیڈروں پر اسمارٹ میٹر کے مسئلہ پر لوگوں کو گمراہ کرنے کا بھی الزام لگایا۔ انہوں نے زبردستی سمارٹ میٹر لگانے کے لیے پولیس فورس کی تعیناتی پر ایل جی انتظامیہ پر کڑی تنقید کی۔ انہوں نے کہا کہ سمارٹ میٹر لگانے کے بعد لوگوں کو بجلی کے بھاری بل بھیجے جا رہے ہیں۔ کپور نے کہا کہ اگر سمارٹ میٹر درست ہیں تو لوگوں کے بل زیادہ کیوں آرہے ہیں۔ کپور نے کہا کہ انہوں نے سمارٹ میٹر کا مسئلہ جانی پور سے شروع کیا تھا اور پوری ریاست میں اس کی مخالفت ہو رہی ہے اور اس نے ایک عوامی تحریک کی شکل اختیار کر لی ہے۔
