70 برس سے مسلط کردہ اِمتیازی پالیسیاں ختم ،چار برس سے بھی کم عرصے میں جموںوکشمیر یوٹی کی مثبت تبدیلی غیر معمولی
لازوال ڈیسک
سری نگر؍؍لیفٹیننٹ گورنر منوج سِنہا نے اِنڈیا فائونڈیشن کے زیراہتمام جموںوکشمیر میں ترقیاتی منظر نامے پر گول میز مباحثے سے خطاب کیا۔لیفٹیننٹ گورنر نے بذریعہ ویڈیو کانفرنسنگ اَپنے خطاب میں اَمن ، خوشحالی اور ترقی کی طرف جموںوکشمیر کے شاندار سفر کا اِشتراک کیا۔اُنہوں نے کہا،’’ چار برس سے بھی کم عرصے میں جموںوکشمیر یوٹی کی مثبت تبدیلی غیر معمولی رہی ہے ۔ ہم نے تقریباً سات دہائیوں سے رائج امتیازی نظام کو ختم کیا ہے اور ایسی جامع پالیسیاں عملائی ہیں جو ترقی کو فروغ دیتی ہیں اور لاکھوں لوگوں کی معیارِ زندگی میں بہتری آئی ہیں۔ لوگوں کو اَپنی زندگی اَپنی مرضی کے مطابق زندگی گزارنے کی آزادی ہے ، بجائے اِس کے کہ وہ دوسروں کے حکم پر چلیں۔‘‘ لیفٹیننٹ گورنر نے جموں کشمیر کے شہریوں کو بااِختیار بنانے کے لئے پُر اَمن اور سازگار ماحول قائم کرنے کے لئے حکومت کی طرف سے متعارف کی گئی اِصلاحات پر روشنی ڈالی۔اُنہوں نے کہا ،’’ آزادی کے بعد پہلی بار جموںوکشمیر کا عام شہری آزادانہ سوچ سکتا ہے اور علیحدگی پسند دہشت گرد نیٹ ورک سے کسی خوف کے بغیر اَپنے جذبات کا اِظہار کرسکتا ہے۔ یہ اُن سب سے بڑی تبدیلیوں میں سے ایک ہے جو عام آدمی وزیراعظم نریندر مودی جی کی قیادت میں مشاہدہ کررہا ہے۔‘‘لیفٹیننٹ گورنر نے کہا کہ اِقتصادی ترقی اورمساوی ترقی ایک تیز رفتار سماجی تبدیلی ہے جس کی عکاسی عام شہریوں کی روزمرہ زندگی میں ہوتی ہے ۔ اُنہوں نے مزید کہا کہ معاشرے میں سبقت حاصل کرنے کی خواہش بڑھ رہی ہے۔اُنہوں نے کہا ،’’ اَمن ترقی کے سفر میں پہلا قدم ہے او رہم اَمن خریدنے میں نہیں بلکہ اَمن قائم کرنے میں یقین رکھتے ہیں ۔ پالیسی اور نیت میں کوئی فرق نہیں ہے ۔ 70برسوں سے مسلط کردہ اِمتیازی پالیسیاں ختم ہوگئی ہیں اور شہریوں کو ترقی کے مساوی مواقع مل رہے ہیں۔‘‘لیفٹیننٹ گورنر نے کہا کہ جی 20 سربراہی اجلاس کے پُر اَمن اِنعقاد ، 34برس بعد کشمیر میں محرم الحرام کا جلوس نکالا جانا، سنیماگھروں کی بحالی ، جموںوکشمیر یوٹی میں سیاحوں کی آمد نے یہ پیغام دیا ہے کہ جموںوکشمیر ترقی کی راہ پر گامزن ہے۔گول میز مباحثے میں صدر اِنڈیا فائونڈیشن رام مادھو، سی اِی او نیتی آیوگ بی ۔ وِی ۔ آر سبرامنیم ، ڈائریکٹر اِنڈیا فائونڈیشن آلوک بنسل ، لیفٹیننٹ جنرل سیّد عطا حسنین ( ریٹائرڈ) ، نامور شخصیات ، ماہرین ، سینئر اَفسروں اور اِنڈیا فائونڈیشن کے اراکین نے اَپنے خیالات کا اِظہار کیا اور جموںوکشمیر کی مساوی اور جامع ترقی کے لئے یوٹی اِنتظامیہ کی طرف سے اُٹھائے گئے اقدامات کی سراہنا کی۔
