تبریز ملک یو این آئی
جموں جموں وکشمیر کے ضلع راجوری میں ہفتہ اور اتوار کی درمیانی رات کے دوران پیش آئے ایک سڑک حادثہ میں چھ افراد جاں بحق ہوگئے۔ حادثہ میں ایک شخص زخمی ہوگیا جسے علاج ومعالجہ کے لئے گورنمنٹ میڈیکل کالج و اسپتال جموں میں داخل کیا گیا ہے۔ ریاستی پولیس کے ایک ترجمان نے بتایا ’گذشتہ رات ایک چھوٹی گاڑی (ٹاٹا میجک زیر نمبر JK11C – 1486) راجوری سے درہال جارہی تھی کہ ڈنڈکوٹ کے مقام پر یہ ڈرائیور کے قابو سے باہر ہوکر 30 سے چالیس فٹ گہری کھائی میں جاگری‘۔ انہوں نے بتایا ’حادثہ میں پانچ افراد موقع پر ہی جاں بحق جبکہ دیگر دو زخمی ہوگئے۔ زخمیوں کو علاج ومعالجہ کے لئے گورنمنٹ میڈیکل کالج و اسپتال جموں منتقل کیا گیا جہاں ایک زخمی زخموں کی تاب نہ لاتے ہوئے دم توڑ گیا‘۔ پولیس نے اس سڑک حادثہ کے سلسلے میں کیس درج کرکے تحقیقات شروع کی ہیں۔ دریں اثنا حریت کانفرنس (ع) چیئرمین میرواعظ مولوی عمر فاروق نے راجوری سڑک حادثہ میں انسانی جانوں کے زیاں پر دکھ اور صدمے کا اظہار کیا ہے۔ انہوں نے مائیکرو بلاگنگ کی ویب سائٹ پر اپنے ایک ٹویٹ میں لکھا ’راجوری میں درہال کے مقام پر سڑک کے ایک دلخراش حادثہ میں 6 قیمتی جانوں کے زیاں پر سخت اظہار دکھ و افسوس، مہلوکین کے اہل خانہ کے ساتھ اظہار ہمدردی و یکجہتی۔زخمیوں کی شفایابی کے لیے دعاگو‘۔
