وزیر اعظم نریندر مودی کو ان تمام معاملات میں اپنی خاموشی توڑنی چاہیے:شرینواس بی وی
نئی دہلی؍؍یوتھ کانگریس نے منگل کو جموں و کشمیر کے سابق گورنر ستیہ پال ملک کے پلوام حملے پر حکومت کی ناکامی اور بدعنوانی سے متعلق انکشافات پر مرکزی حکومت کے خلاف احتجاج کیا اور کہا کہ اس انکشاف کے بعد وزیر اعظم نریندر مودی کو ان تمام معاملات میں اپنی خاموشی توڑنی چاہیے۔یوتھ کانگریس کے صدر شرینواس بی وی نے یہاں احتجاج کر رہے نوجوانوں سے خطاب کرتے ہوئے کہا کہ مسٹر ملک نے جو انکشافات کئے ہیں وہ چونکا دینے والے ہیں اور مسٹر مودی کو اس معاملے میں اپنی خاموشی توڑتے ہوئے ملک کو جواب دینا چاہئے کہ حکومت نے اس معاملے میں اپنی غلطی چھپانے کا کام کیوں کیا۔انہوں نے کہا کہ وزیر اعظم کو بتانا چاہیے کہ وہ اپنے لیے 8 ہزار کروڑ روپے کے دو طیارے خریدتے ہیں، 20 ہزار کروڑ روپے کی عمارت بناتے ہیں، لیکن وہ ملک کے فوجیوں کو ہوائی جہاز سے بھیجنے کے لیے پانچ طیارے کیوں فراہم نہیں کرا سکتے۔ یوتھ کانگریس لیڈر نے کہا کہ سی آر پی ایف کا قافلہ جموں سے سرینگر کے لیے خطرے کے ساتھ روانہ ہوتا ہے اور راستے میں قافلے پر 300 کلو گرام وزنی دھماکہ ہوا جس میں 40 جوان شہید ہو گئے۔ یہ حکومت کی ناکامی تھی اور اسے اس کا جواب دینا چاہیے۔ یوتھ کانگریس کے قومی میڈیا انچارج ورون پانڈے نے بتایا کہ مظاہرے میں یوتھ کانگریس کے قومی جنرل سکریٹری اور دہلی کے انچارج کوکو پاڑھی، دہلی یوتھ کانگریس کے صدر رنوجے سنگھ لوچو، جموں و کشمیر یوتھ کانگریس کے صدر ادے بھانو چب، یوتھ کانگریس کے نیشنل سکریٹری رچی بھارگو سمیت بڑی تعداد میں یوتھ کانگریس کارکنوں نے شرکت کی۔
