لازوال ڈیسک
کشتواڑ؍؍نیشنل کانفرنس کے سینئر لیڈر اجیت بھگت نے محکمہ صحت عامہ (پی ایچ ای) کے ذریعہ کشتواڑ کے رہائشیوں کو پینے کے غیر صحت بخش پانی کی فراہمی پر اپنی تشویش کا اظہار کیا ہے۔بھگت نے کہا کہ محکمہ پبلک ہیلتھ انجینئرنگ (پی ایچ ای) کشتواڑ کے رہائشیوں کو غیر فلٹر پانی فراہم کر رہا ہے جس کی وجہ سے علاقے میں پانی سے پیدا ہونے والی بیماریاں پھیل رہی ہیں۔کشتواڑ میں پینے کے پانی کا بنیادی ذریعہ ناء گڑھ واٹر سپلائی سکیم اور لہلہ واٹر سپلائی سکیم ہیں تاہم سابقہ حکومتوں نے فلٹر پلانٹ لگائے تھے لیکن یہ فلٹر پلانٹس کئی دہائیوں سے لاوارث پڑے ہیں جس کی وجہ سے وہاں کے باشندوں کو بغیر فلٹر کے پانی فراہم کیا جا رہا ہے اور بغیر فلٹریشن کے پائپوں کے ذریعے پانی فراہم کیا جاتا ہے۔ اجیت بھگت نے یہ بھی کہا کہ میونسپل کونسل کشتواڑ کے مختلف نالوں سے گزرنے والے کئی مقامات پر بڑی تعداد میں پائپ چٹ گئے ہیں جن میں جمع پانی داخل ہو کر مکینوں تک پینے کے لیے پہنچ جاتا ہے جس کے نتیجے میں پانی سے پیدا ہونے والی کئی بیماریاں پھیل چکی ہیں۔ بھگت نے متعلقہ حکام سے فلٹر پلانٹس کو فعال بنانے کی اپیل کی ہے تاکہ مکینوں کو پینے کے صاف پانی کی فراہمی ممکن ہو سکے۔
