‘پی ڈی پی ریاست میں ترقی،خوشحالی اور امن کا ماحول پیدا کرنے کیلئے وعدہ بند ہے:ایڈوکیٹ شفیق الرحمان بٹ
شوکت پرواز
درماڑی//پیوپلز ڈیموکریٹک پارٹی کے ریاست میں حالات کو نارمل سطح پر لانے کے وعدہ کو دہراتے ہوئے پی ڈی پی لیڈر اور پارٹی کے ضلع ریاسی کے صدر شفیق الرحمان بٹ نے کہا ہے کہ پی ڈی پی ریاست کی واحد سیاسی پارٹی ہے جو ریاست میں امن اور خوشحالی لانے کیلئے وعدہ بند ہے۔ حلقہ گلابگڑھ کے بلاک چسانہ کے گاو¿ں چائی پھگولی میں ایک عوامی جلسے سے خطاب کرتے ہوئے کہا انہوں نے کہا کہ ریاست اس وقت مشکل حالات سے گزررہی ہے جو کہ مرکزی حکومت اور ریاستی انتظامیہ کی ریاست کے تئیں غلط پالیسوں کا نتیجہ ہے۔ انہوں نے کہا کہ پی ڈی پی ریاست جموں و کشمیر کی واحد سیاسی جماعت ہے جس کے پاس ریاست میں امن لانے’ عوام کی ترقی اور خوشحالی کیلئے واضح اجینڈا ہے۔ انہوں نے مزید کہا کہ جموں و کشمیر کی دلچسپی اور خصوصی حالت کو برقرار رکھنے کیلئے پارٹی کے پاس ایک واضح اخلاقی بناوٹ ہے۔ پارٹی کی حصولیابیوں کا ذکر کرتے ہوئے شفیق بٹ نے کہا کہ یہ پی ڈی پی جماعت کی کوششوں کا ہی نتیجہ ہے کہ جس نے عوام کا جمہوری اداروں میں دوبارہ یقین اور بھروسہ پیدا کیا۔ انہوں نے واضح کیا کہ پی ڈی پی کا مقصد صرف اقتدار حاصل کرنا نہیں بلکہ یہ لوگوں کو انصاف۔ ان کے بنیادی حقوق اور برابری کی بنیاد پر ایک نظام فراہم کرنے کیلئے ایک تحریک ہے۔ انہوں نے عوام سے اپیل کی کہ وہ ریاست میں امن ترقی اور خوشحالی کیلئے پی ڈی پی کا ساتھ دیں۔ انہوں نے واضح کیا کہ پی ڈی پی ریاست کی خصوصی حالت کو برقرار رکھنے کیلئے وعدہ بند ہے اور دفعہ 35 اے کے ساتھ کسی بھی قسم کی چھیڑ چھاڑ کو برداشت نہیں کرے گی۔ انہوں نے عوام کو خبردار کیا کہ وہ ایسی طاقتوں سے باخبر رہیں جو عوام کو ذات پات کے نام پر تقسیم کر کے اپنے سیاسی عزائم حاصل کرنا چاہتے ہیں۔ انہوں نے پارٹی ورکروں پر زور دیا کہ وہ تن دہی سے محنت کریں تاکہ لوگوں کی مشکلات کو حل کیا جاسکے۔ اس موقعہ پر نیشنل کانفرنس اور کانگرس کے سینکڑوں ورکروں نے پی ڈی پی میں شمولیت اختیار کی۔ پی ڈی پی میں نئے شامل ہونے والے ورکروں کا خیر مقدم کرتے ہوئے شفیق بٹ نے کہا کہ اس سے حلقہ گلابگڑھ میں پارٹی مزید مضبوط ہوگی۔ اس دورے میں سینئر لیڈر چوہدری ماسٹر محمد اسرائل۔ حاجی عبدالسبحان ملک۔ لیاقت علی خان۔ حاجی محمد اعظم شاہ۔ سخی محمد سرپنچ۔ حاجی سرپنچ عبداللہ وانی۔ نوجوان لیڈر چندر پرتاب سنگھ۔ محمد رفی شاہ۔ چوہدری ذاکر حسین۔ سرپنچ مشتاق احمد انگرالہ۔ نصیب محمد ملک۔ احمد دین ملک۔ صوفی زبیر احمد۔ نوجوان لیڈر محمد عثمان طولی وغیرہ نے بھی حصہ لیا اور عوام سے تفصیلی بات چیت کی۔
