جموں و کشمیر پولیس اس کی فرض شناسی اور ہندوستان کے پرچم کو سربلند رکھنے میں دی گئی عظیم قربانی کی مقروض:ایس ایس پی
یاسین احمد
ریاسی؍؍دہشت گردوں کے خلاف لڑتے ہوئے بہادر اسپیشل پولیس آفیسر (ایس پی او) کی جانب سے پیش کی گئی عظیم قربانی کو خراج تحسین پیش کرنے کے لیے، گورنمنٹ ہائی اسکول باگلی کو شہید ایس پی او اندر سنگھ کے نام پر وقف کیا گیا ہے۔ ریاسی کے ایڈیشنل سپرنٹنڈنٹ پولیس سرجیت کمار، سی ای او ریاسی محترمہ سنیتا بالی، ایس ڈی پی او ارناس پرتھپال سنگھ، تحصیلدار ٹھکرا کوٹ انیل مگوترا نے دور افتادہ پہاڑی کی چوٹی والے گاؤں باگلی کا دورہ کیا اور علاقے کے پی آر آئی ارکان کی موجودگی میں اسکول کو شہید کے نام وقف کیا۔ افسران نے اسکول میں شہید اندر سنگھ کی تصویر بھی لگائی۔ ایس پی او اندر سنگھ مرحوم 23-03-1966 کو دور دراز کے گاؤں تھانول تحصیل ارناس ضلع ریاسی میں منی رام کے ہاں پیدا ہوئے۔ اس نے 15-12-1999 کو ارناس مہور علاقے میں عسکریت پسندی کے عروج کے دور میں جموں و کشمیر پولیس میں شمولیت اختیار کی۔ وہ 18.08.2003 کو تھنول میں ملک دشمن دہشت گردوں کے خلاف لڑتے ہوئے ایک انکاؤنٹر میں زخمی ہوئے اور بعد میں 23.08.2003 کو GMC جموں میں زخموں کی تاب نہ لاتے ہوئے چل بسے اور جام شہادت نوش کیا۔ اس موقع پر خطاب کرتے ہوئے ایڈیشنل ایس پی ریاسی نے بتایا کہ ایس پی او اندر سنگھ اپنے ساتھیوں میں بہت مددگار اور مقبول تھے۔ وہ انتہائی دلیر اور بہادر پولیس اہلکار تھا جس نے اس دن خود کو سرچ پارٹی کا حصہ بننے کے لیے رضاکارانہ طور پر پیش کیا اور قوم کے لیے اپنی جان کا نذرانہ پیش کیا۔ اس موقع پر دیگر افسران نے بھی خطاب کرتے ہوئے شہید کو زبردست خراج عقیدت پیش کیا اور کہا کہ حکومت کے اس اقدام سے نوجوان شہداء کی عظیم قربانیوں کے بارے میں جان سکیں گے۔ یہ نہ صرف شہریوں میں قوم پرستی کے جذبے کو پروان چڑھائے گا بلکہ شہداء کو بھی امر کر دے گا، جنہیں ان کے ناموں سے یاد رکھا جائے گا۔ جموں و کشمیر پولیس اس کی فرض شناسی اور ہندوستان کے پرچم کو سربلند رکھنے میں دی گئی عظیم قربانی کی مقروض ہے۔
