گپتا نے نئے آنے والوں کا خیرمقدم کیا،کہا امید ہے کہ نئی شمولیت جموں میں پارٹی کی بنیاد کو مضبوط کرے گی
لازوال ڈیسک
جموں؍؍ نیشنل پینتھرس پارٹی اور بھارتیہ جنتا پارٹی سے وابستہ کئی کارکنوں نے آج صوبائی صدر جموں رتن لال گپتا اور صوبائی سیکرٹری شیخ بشیر احمد کی موجودگی میں جموں و کشمیر نیشنل کانفرنس میں شمولیت اختیار کی۔ واضح رہے اس سلسلے میں ایک شمولیتی پروگرام کا انعقاد ضلع صدر ادھم پور اربن سنیل ورما نے کیا تھا۔وہیںرتن لال گپتا نے پارٹی میں نئے شامل ہونے والوں کا خیرمقدم کرتے ہوئے امید ظاہر کی کہ اس شمولیت سے پارٹی کو مجموعی سطح پر تکثیری، ترقی پسند، جمہوری اور متحدہ جموں و کشمیر کے نظریہ کو مضبوط بنانے میں مدد ملے گی۔ انہوں نے کارکنوں کو متحد ہو کر کام کرنے اور فرقہ پرست طاقتوں کو شکست دینے کی تلقین کرتے ہوئے کہا کہ نیشنل کانفرنس کی بھائی چارے کو فروغ دینے اور تقسیم کرنے والی طاقتوں کو ناکام بنانے کی ایک شاندار تاریخ ہے۔گپتا نے اس موقع پر اظہار خیال کرتے ہوئے جموں و کشمیر کے مختلف محکموں میں کنٹریکٹ یا ایڈہاک بنیادوں پر کام کرنے والے ڈیلی ریٹیڈ ورکرز اور کیجول ورکرز کے دیگر زمروں کو جلد ریگولرائز کرنے کا مطالبہ کیا۔ انہوں نے تاخیر پر افسوس کا اظہار کرتے ہوئے کہا کہ اس سے ہزاروں نوجوانوں کا کیریئر خطرے میں پڑ گیا ہے۔ انہوں نے کہا کہ اس سے ہزاروں خاندانوں اور منسلک افراد کو راحت ملے گی، جن کا کیریئر طویل عرصے سے داؤ پر لگا ہوا ہے۔وہیںشیخ بشیر احمد اور سنیل ورما نے این سی میں نئے شامل ہونے والوں کا خیرمقدم کرتے ہوئے اس بات کا اعادہ کیا کہ نیشنل کانفرنس کی جڑیں جموں و کشمیر کے ہر کونے اور کونے میں گہری ہیں۔
