لازوال ڈیسک
جموں؍؍ساحلی علاقوں، سمندری ساحلوں اور آبی ذخائر کو صاف کرنے کے لیے ڈی جی این سی سی کے ذریعے شروع کیے گئے قومی پہل ’پنیت ساگر ابھیان‘میں حصہ ڈالنے کے لیے، این سی سی ڈائریکٹوریٹ جموں، کشمیر اور لداخ کے علاقے میں ندیوں کے کناروں اور آبی ذخائر سے متصل علاقوں کی صفائی میں اپنا حصہ ڈال رہا ہے۔یہ مہم آج پورے جوش و خروش کے ساتھ شروع ہوئی جس میں این سی سی کیڈٹس نے بیک وقت ندیوں اور آبی ذخائر کو صاف کرنے کے لیے مختلف جگہوں پر مہم کا آغاز کیا اور عوام کو اپنے آبی ذخائر کو پلاسٹک اور دیگر نقصان دہ آلودگیوں سے پاک رکھنے کی اہمیت سے آگاہ کرنے کی مہم بھی چلائی۔ جموں اور سری نگر دونوں گروپوں کے این سی سی کیڈٹس نے پورے جوش و خروش کے ساتھ حصہ لیا۔ یہ مہم آج کیڈٹس اور اے این اوز نے بندر کوٹ میں دریائے چناب، بھدرواہ میں دریائے نیرو، جموں بکرم چوک کے قریب دریائے توی، بدیان پٹن میں کٹھوعہ کینال، پرتھو میں رنجیت ساگر ڈیم، ادھم پور میں دیویکا ندی، دریائے بسنتر کو صاف کرنے کی کوشش کے ساتھ شروع کی تھی۔ دریں اثناء کیڈٹس نے نہ صرف دریاؤں اور آبی ذخائر کی صفائی کی بلکہ بعض مقامات پر عوامی آگاہی مارچ بھی کیا تاکہ عوام کو اپنے آبی ذخائر اور کرہ ارض کو صاف اور سرسبز رکھنے کی ضرورت سے آگاہ کیا جا سکے۔
