70برسوں سے تین خاندانوں نے جموں وکشمیرکولوٹا،وزیراعظم مودی ہمارے مسیحابنے:ڈاکٹر دویندرمنیال
لازوال ڈیسک
جموں؍؍بھارتیہ جنتا پارٹی کی اسٹار پرچارک اور سابق مرکزی وزیر سمرتی ایرانی نے کہا ہے کہ وزیر اعظم نریندر مودی نے جموں و کشمیر کی ترقی کو حقیقت میں بدلنے کا کام کیا ہے۔ کانگریس اور نیشنل کانفرنس کی
حکومتوں میں صرف علیحدگی پسندی اور دہشت گردی کا زور رہا اور لوگ بنیادی سہولیات سے بھی محروم رہے۔
رام گڑھ اسمبلی حلقے میں پارٹی امیدوار ڈاکٹر دیویندر کمار منیال کے حق میں نند پور، راج پورہ منڈل میں انتخابی جلسوں سے خطاب کرتے ہوئے سمرتی ایرانی نے کہا کہ مودی حکومت نے خواتین کو عزت اور حقوق دینے کا کام کیا ہے۔انہوں نے کہا کہ جموں و کشمیر میں بی جے پی کی حکومت آنے پر ہر خاندان کی سب سے سینئر خاتون کو 18 ہزار روپے سالانہ دیے جائیں گے۔جموں و کشمیر کے نوجوانوں کو یو پی ایس سی اور جموں و کشمیر پبلک سروس کمیشن کا امتحان دینے کے لیے 10 ہزار روپے کوچنگ فیس دی جائے گی۔
انہوں نے کہا کہ وزیر اعظم نریندر مودی نے جموں و کشمیر کو ملک کی سب سے زیادہ ترقی یافتہ ریاست بنانے کی سمت میں کام شروع کیا ہے۔ آرٹیکل 370 کی منسوخی کے بعد جموں و کشمیر کے ہر طبقے کے لوگوں کے ساتھ انصاف ہوا ہے۔دہشت گردی اور علیحدگی پسندی اب ماضی کی بات ہو چکی ہے۔ لوگ امن اور خوشحالی کے ثمرات حاصل کر رہے ہیں۔ سیاحوں کی تعداد میں کئی گنا اضافہ ہوا ہے۔ یہ سب وزیر اعظم نریندر مودی کی قابل قیادت میں ممکن ہوا ہے۔مودی ہیں تو ممکن ہے۔ انہوں نے کہا کہ جموں و کشمیر میں بی جے پی کی حکومت آنے کے بعد ہر خاندان کی سینئر خاتون کو 18 ہزار روپے سالانہ، کسانوں کو وزیراعظم کسان ندھی کے تحت 10 ہزار روپے، طلبہ کو لیپ ٹاپ اور سفری بھتہ دیا جائے گا۔ خواتین کو سال میں دو سلنڈر بھی مفت دیے جائیں گے۔ مودی حکومت امن اور خوشحالی کو یقینی بنا رہی ہے۔
اس موقع پربولتے ہوئے پارٹی اُمیدوار ڈاکٹر دریندرکمار منیال نے کہاکہ وزیراعظم نریندرمودی نے جموں وکشمیرکوامن کاگہوارہ بنایاہے اورجموں کیساتھ انصاف صرف اور صرف مودی نے کیاہے۔اُنہوں نے کہاکہ ستر برسوں سے جن طبقوں کوتین خاندانوں نے ان کے آئینی حقوق سے محروم رکھاانہیں انصاف صرف وزیراعظم نریندرمودی نے دیاہے۔اُنہوں نے کہاکہ تین خاندانوں نے جموں وکشمیرکو 70برسوں سے لوٹا جبکہ وزیراعظم نریندرمودی نے ایک مسیحا بن کر سب کیساتھ انصاف کیا۔اُنہوں نے لوگوں سے اپیل کی کہ وہ جموں وکشمیراورملک کے مفادمیں اورپرامن وخوشحال جموں وکشمیرکیلئے بھارتیہ جنتاپارٹی کو بھاری اکثریت کیساتھ کامیاب بنائیں۔اس موقع پرکیشودت ڈی ڈی سی چیئرمین ، ڈی ڈی سی سربجیت ، آشا، رامیش ، انیتا، چوہدری سبھاش بھگت ،بی ڈی سی رادھے شام ،درشن سنگھ ،منڈل صدور چوہدری شیو شمسیر اورکلبھوشن موجودتھے۔
