ضلع میں اخراجات کی نگرانی کے نظام کا تفصیلی جائزہ لیا
لازوال ڈیسک
ڈوڈہ// ضلع ڈوڈہ کے اخراجات کے مبصر ارشدیپ سنگھ نے آج یہاںضلع انتخابی دفتر کا معائنہ کیا اور آئندہ اسمبلی انتخابات 2024 کے لیے تشکیل دی گئی اخراجات کی نگرانی کرنے والی ٹیم کے ارکان کے ساتھ میٹنگ کی۔اس دوارن ڈسٹرکٹ الیکشن آفیسر ہرویندر سنگھ نے ایک پی پی ٹی پریزنٹیشن دی جس میں ضلع الیکشن اتھارٹی کی طرف سے الیکشن سے متعلق اخراجات کی نگرانی کے لیے اٹھائے گئے اقدامات کے بارے میں تفصیل بتائی گئی۔مبصر نے افسران پر زور دیا کہ وہ انتخابی عمل کے اختتام تک اپنی ذمہ داریاں پوری تندہی سے نبھائیں۔
انہوں نے انتخابی مدت کے دوران ٹیم کو اپنی رسائی کی یقین دہانی کرائی، کسی بھی سوالات یا خدشات کے ساتھ ان تک پہنچنے کی ترغیب دی۔میٹنگ کے بعد ایکسپینڈیچر آبزرور نے ڈی سی آفس میں قائم ایم سی ایم سی، کمپلینٹ مینجمنٹ سیل، ویڈیو ویونگ ٹیم اور اسسٹنٹ ایکسپینڈیچر آبزرور سیل کا معائنہ کیا۔ انہوں نے اخراجات کے ریکارڈ کا جائزہ لیا، اخراجات کی صداقت کی تصدیق کی اور انتخابی دفتر کی جانب سے انتخابی قوانین کی پابندی پر زور دیا۔اخراجات کے مبصر کے ساتھ ضلع الیکشن آفیسر، ہرویندر سنگھ، ڈپٹی ڈسٹرکٹ الیکشن آفیسر ڈوڈا، اور دیگر موجود تھے۔
