کہاپی ایم’بیٹی بچاؤ کا نعرہ‘دیتے رہے لیکن پرجول ریونا پر اپنی خاموشی نہیں توڑی
یواین آئی
نئی دہلی؍؍کانگریس نے وزیر اعظم نریندر مودی پر زور دیا ہے کہ وہ کرناٹک کی ہاسن سیٹ سے جنتا دل (سیکولر) کے رکن پارلیمنٹ پرجول ریونا کے معاملے میں اپنی خاموشی توڑیں اور اس بات کو یقینی بنائیں کہ گرفتار ممبر پارلیمنٹ کی حمایت نہ کریں تاکہ بیٹیوں کو انصاف مل سکے۔
مہیلا کانگریس کی صدر الکا لامبا نے ہفتہ کو یہاں پارٹی ہیڈکوارٹر میں ایک پریس کانفرنس میں کہا کہ کئی خواتین کی عصمت دری سے متعلق موصول ہونے والی شکایات کے بعد رکن پارلیمنٹ کو گرفتار کیا گیا ہے۔ انہوں نے امید ظاہر کی کہ اس گرفتاری سے سینکڑوں مظلوم خواتین کو انصاف ملے گا۔
انہوں نے کہا ” کرناٹک حکومت کی طرف سے بنائی گئی خصوصی تفتیشی ٹیم (ایس آئی ٹی) نے ریاست کے ہاسن لوک سبھا حلقے سے ممبر پارلیمنٹ پرجول ریونا کوگرفتار کیا ہے۔ یہ کام ایس آئی ٹی کی تشکیل کردہ خواتین پولیس ٹیم نے کیا ہے۔ اس کے لیے ہم کرناٹک حکومت کو مبارکباد پیش کرتے ہیں”۔
کانگریس کی لیڈر نے وزیر اعظم سے اس معاملے میں اپنی خاموشی توڑنے کی اپیل کرتے ہوئے کہا ” مسٹر نریندر مودی ‘بیٹی بچاؤ کا نعرہ’ دیتے رہے لیکن پرجول ریونا پر اپنی خاموشی نہیں توڑی۔ کرناٹک کے وزیر اعلیٰ سدار میا نے مسٹر مودی کو خط لکھ کر ان سے کہا کہ ملک چھوڑکر بیرون ملک چلے جانے والے پرجول ریونا کو واپس لایا جائے لیکن وزیر اعظم نے وزیر اعلیٰ کے خط کا جواب نہیں دیا، یہ ظاہر کرتا ہے کہ مودی جی پر جول ریونا کے معاملے میں کتنے سنجیدہ تھے۔انہوں نے کہا "راہ ل گاندھی جی نے متاثرین کو انصاف کی یقین دہانی کرائی تھی۔ انہوں نے مسٹر مودی سے ایک سوال بھی پوچھا تھا کہ آپ اجتماعی عصمت دری کرنے والے کو کیوں بچا رہے ہیں۔ پرینکا گاندھی جی نے بھی پرجول ریونا کے معاملے میں نریندر مودی کی خاموشی پر سوال اٹھایا۔ مسٹر مودی نے آج تک اس معاملے پر خاموشی نہیں توڑی ہے۔
مہیلا کانگریس کی صدر نے کہا ‘‘یہ حیرت کی بات ہے کہ سینکڑوں لوگوں نے اس معاملے میں آواز اٹھائی ہے اور مسٹر مودی سے کارروائی کرنے کی اپیل کی ہے لیکن آج تک انہوں نے اس معاملے پر اپنی خاموشی نہیں توڑی ہے۔ حقیقت یہ ہے کہ بی جے پی کی اعلیٰ قیادت کو پرجول ریونا کے ہزاروں ویڈیوز کے بارے میں مطلع کیا گیا تھا، اس کے باوجود نریندر مودی نے اسٹیج پر کھڑے ہو کر پرجول ریونا کے لیے ووٹ مانگا۔
محترمہ لامبا نے کہا "ہم مطالبہ کرتے ہیں کہ ایک خصوصی عدالت یا ایک فاسٹ ٹریک عدالت بنائی جائے اور ملزم کو تین ماہ کے اندر سزا دی جائے۔ دونوں باپ بیٹا یہ جرم کر رہے تھے۔ ان کے موبائل سے جمع کی گئی تمام ویڈیوز ان کو بھیج دی گئیں۔ وزیر اعظم، وزیر داخلہ اور بھارتیہ جنتا پارٹی (بی جے پی) کے صدر تک پہنچنے کے باوجود پر جول ریونا کو ٹکٹ دینے، ان کی حمایت کرنے اور ان کے لیے مہم چلانے اور ووٹ مانگنے کا فیصلہ کیا جاتا ہے۔محترمہ لامبا نے مدھیہ پردیش کے ساگر میں اجتماعی عصمت دری کا معاملہ بھی اٹھایا اور کہا کہ بی جے پی حکومت کے دور میں ساگر میں اجتماعی عصمت دری کا شکار ہونے والی لڑکی کی ایمبولینس سے گرنے کے بعد مشتبہ حالات میں موت ہوگئی۔ وزیر اعظم عصمت دری کے واقعات میں خاموشی اختیار کر رہے ہیں اور ان کی خاموشی سے مجرموں کے حوصلے بڑھ رہے ہیں۔ مہیلا کانگریس کی صدر نے کہا کہ اگرچہ پرجول ریونا کو گرفتار کر لیا گیا ہے، اس کے باوجود ثبوتوں کے ساتھ چھیڑ چھاڑ کا امکان ہے، اس لیے وہ وزیر اعظم سے اس معاملے میں خاموشی توڑنے اور مجرموں کو کسی قسم کی مدد فراہم نہ کرنے کو یقینی بنانے کی اپیل کرتی ہیں۔
