دِلی حکومت ہیلتھ اسسٹنٹ تیار کرے گی:کیجریوال
لازوال ڈیسک
نئی دہلی؍؍دہلی کے وزیر اعلی اروند کیجریوال نے کہا کہ دہلی حکومت کورونا کی ممکنہ تیسری لہر کے پیش نظر 5000 ہیلتھ اسسٹنٹ تیار کرے گی ، جس کے تحت ہیلتھ معاونین کی حیثیت سے پانچ ہزار نوجوانوں کی تربیت دی جائے گی ۔مسٹر کیجریوال نے آج یہاں پریس کانفرنس میں بتایاکہ پہلی اور دوسری لہر کے دوران طبی اور پیرامیڈیکل عملے کی کمی تھی۔ اس کے پیش نظر 5000 ہیلتھ اسسٹنٹس تیار کرنے کا فیصلہ کیا گیا ہے۔ حکومت انہیں آئی پی یونیورسٹی اور 9 میڈیکل انسٹی ٹیوٹ میں نرسنگ ، پیرامیڈکس ، ہوم کیئر ، بلڈ پریشر کی پیمائش ، ویکسینیشن وغیرہ کی بنیادی تربیت فراہم کرے گی۔وزیراعلیٰ نے بتایا کہ ہیلتھ اسسٹنٹس ڈاکٹروں اور نرسوں کے معاونین کے طور پر کام کریں گے اور وہ خود فیصلہ نہیں کرسکیں گے۔ ان کی مدد سے ڈاکٹر زیادہ موثر انداز میں کام کر سکیں گے اور مریضوں کی دیکھ بھال بھی بہت اچھے طریقے سے کر سکیں گے۔ اس کے لئے 18 سال سے زیادہ عمر کے 12 ویں کلاس پاس نوجوان 17 جون سے آن لائن درخواست دے سکتے ہیں اور ان کی تربیت 28 جون سے 500-500 کے بیچوں میں شروع ہوگی۔ مجھے لگتا ہے کہ اس فیصلے سے ہماری تیسری لہر کی جاری تیاریوں کو زبردست فروغ ملے گا۔وزیراعلی نے بتایا کہ جیسا کہ آپ سب دیکھ رہے ہیں کہ دہلی میں پچھلے کچھ دنوں سے ممکنہ تیسری لہر سے دہلی کو بچانے کے لئے تیاریاں کی جارہی ہیں۔ میں نے پچھلے کچھ دنوں میں متعدد اسپتالوں کا بھی دورہ کیا تاکہ ممکنہ تیسری لہر کی تیاریوں کا جائزہ لیا جاسکے۔مسٹر کیجری وال نے بتایا کہ دہلی میں بہت سے نئے آکسیجن پلانٹس بھی لگائے جارہے ہیں۔ آکسیجن کنسنٹریٹر ، آکسیجن سلنڈر اور آکسیجن اسٹوریج ٹینک سمیت بہت ساری تیاریاں ممکنہ تیسری لہر کے لئے کی جارہی ہیں ، لیکن اگر تیسری لہر آجائے گی تو جیسا کہ ہم نے پہلی اور دوسری لہر میں دیکھا ہے وہاں طبی اور پیرامیڈیکل عملے کی بہت بڑی کمی ہوجاتی ہے۔ اس بات کو مدنظر رکھتے ہوئے دہلی حکومت نے 5000ہیلتھ اسسٹنس کو تیار کرنے کا ایک بہت ہی شاندار منصوبہ بنایا ہے۔ انہیں تکنیکی زبان میں کمیونٹی نرسنگ اسسٹنٹس بھی کہا جاتا ہے۔مسٹر کیجریوال نے بتایاکہ پانچ ہزار نوجوانوں کو یہ تربیت دی جائے گی۔ دو ہفتوں کی یہ تربیت آئی پی یونیورسٹی فراہم کرے گی اور دہلی کے 9 بڑے طبی ادارے ہیں جہاں ان لوگوں کو بنیادی تربیت دی جائے گی۔انہوں نے مزید بتایاکہ پانچ ہزار ، جو ہیلتھ اسسٹنٹس یا کمیونٹی نرسنگ اسسٹنٹس بنیں گے وہ ڈاکٹروں اور نرسوں کے معاونین کی حیثیت سے کام کریں گے اور وہ خود فیصلہ نہیں کرسکیں گے۔ ان افراد کو بنیادی نرسنگ ، پیرامیڈکس ، زندگی بچانے ، ابتدائی طبی امداد ، گھر کی دیکھ بھال وغیرہ کی تربیت دی جائے گی۔ انہیں بنیادی تربیت دی جائے گی۔ جیسے آکسیجن کی پیمائش ، بلڈ پریشر کی پیمائش ، ویکسین کیسے لگائی جائے ، اگر ویکسینیشن کروانی ہے تو وہ کیسے کرتے ہیں۔ مریضوں کی دیکھ بھال، ڈائبر تبدیل کرنے ، کیتھیٹر ، نمونہ جمع کرنے ، کنسنٹریٹر کیسے کام کرتا ہے ، سلنڈر کیسے لگائے جاتے ہیں ، ماسک کیسے لگانا ہے وغیرہ جیسے کاموں کی تربیت دی جائے گی۔
