یہ کووڈ لہر نہیں ’سنامی‘ ہے: راہل گاندھی
لازوال ڈیسک
نئی دہلی؍؍ہندوستان میں کورونا انفیکشن کے پھیلائو پر اپنی رائے ظاہر کرتے ہوئے راہل گاندھی نے کہا کہ کووڈ-19 وبا مکمل تباہی لا رہی ہے۔ یہ کورونا کی لہر نہیں ہے بلکہ سنامی ہے جو ہر چیز تباہ کر رہی ہے۔ہندوستان میں کورونا انفیکشن کے لگاتار پھیلائو اور بے قابو ہو چکے حالات سے سبھی پریشان ہیں۔ روزانہ ریکارڈ معاملے سامنے آ رہے ہیں اور ہفتہ کے روز وزارت صحت کی جانب سے جاری اعداد و شمار نے ایک بار پھر سب کو دہشت میں ڈال دیا ہے۔ اسپتالوں میں آکسیجن اور ریاستوں میں ویکسین کی کمی کی خبریں پہلے ہی لوگوں کو خوف میں مبتلا کیے ہوئے ہے، اور لگاتار اموات نے مرکز کی مودی حکومت پر کئی طرح کے سوال کھڑے کر دیئے ہیں۔ اس درمیان کانگریس کے سابق صدر راہل گاندھی نے ملک پر چھائے کورونا بحران کے تعلق سے خبر رساں ادارہ ’پی ٹی آئی‘ سے خصوصی گفتگو کی جس میں کھل کر اپنی بات سامنے رکھی۔راہل گاندھی کا کہنا ہے کہ اس وقت ہندوستان پوری دنیا میں کورونا وائرس انفیکشن کا سنٹر ہے۔ پوری دنیا ہمارے ملک میں جو بھی دیکھ رہی ہے، اس سے پریشان ہو رہی ہے۔ ہندوستان میں پیدا اس ماحول کے لیے راہل گاندھی نے مرکزی حکومت کو تنقید کا نشانہ بھی بنایا۔ انٹرویو کے دوران راہل گاندھی نے کہا کہ کووڈ-19 وبا مکمل تباہی لا رہی ہے۔ یہ کورونا کی لہر نہیں ہے بلکہ سنامی ہے جو ہر چیز تباہ کر رہی ہے۔ حکومت پر حملہ آور رخ اختیار کرتے ہوئے راہل گاندھی نے کہا کہ ’’کورونا کی حالت آئوٹ آف کنٹرول ہونے پر حکومت نے گیند کو ریاستوں کے پالے میں ڈال دی ہے۔ شہری سچ میں آتم نربھر (خودکفیل) ہو رہے ہیں۔‘‘راہل گاندھی نے کورونا ویکسین کی قیمتوں کو لے کر بھی حکومت کو تنقید کا نشانہ بنایا، ساتھ ہی انھوں نے کہا کہ کورونا انفیکشن محض مسئلہ کا حصہ ہے۔ ہندوستان کوئی بھی بڑا بحران برداشت نہیں کر سکتا ہے۔ انٹرویو کے دوران راہل گاندھی نے کانگریس میں تنظیمی انتخابات کے تعلق سے بھی بات کی۔ انھوں نے کہا کہ کانگریس میں تنظیمی انتخابات وقت پر ہوں گے اور میں وہی کروں گا جو پارٹی چاہے گی۔ لیکن ابھی ہمارا دھیان وبا پر ہے۔
