سری نگر، // نیشنل کانفرنس کے اراکین پارلیمان نے حکومت اور انتظامیہ پر زور دیا ہے کہ کورونا وائرس کی دوسری لہر میں شدید اچھال کو قابو کرنے کے ساتھ ساتھ بیماری میں مبتلا مریضوں کے علاج و معالجہ کے لئے جنگی بنیادوں پر اقدامات اٹھائے جائیں۔
پارٹی کے اراکن پارلیمان برائے شمالی کشمیر محمد اکبر لون اور جنوبی کشمیر جسٹس (ر) حسنین مسعودی نے کورونا وائرس کے حد سے زیادہ پھیلاﺅ کی وجہ سے ہسپتالوں میں جگہ اور علاج و معالجہ کی دیگر سہولیات کی کمی پر زبردست تشویش کا اظہار کیا ہے۔
انہوں نے کہا کہ انتظامیہ کو جنگی بنیادوں پر عارضی آئیسولیشن سینٹروں اور ہسپتالوں کا قیام عمل میں لانا چاہئے تاکہ صورتحال سنگین ہونے کی صورت میں تیاری مکمل ہو۔
دونوں لیڈران نے کہا کہ نیشنل کانفرنس نے دوسری لہر کے شروع ہونے کے ساتھ ہی انتظامیہ پر بار بار زور دیا تھا کہ ہسپتالوں کو ادویات اور دیگر ساز و سمان سے لیس کیا جائے اور اضافی بیڈوں اور آئیسولیشن سینٹروں کا قیام عمل میں لایا جائے لیکن انتظامیہ کے کانوں پر جوں تک نہیں رینگی اور آج صورتحال یہ ہے کہ ہسپتالوں میں جگہ ختم ہوگئی ہے اور آکسیجن و وینٹرولیٹوں کی کمی محسوس ہونے لگی ہے۔
اُن کا کہنا تھا کہ اگر حکومتی اور انتظامی سطح پر مزید بے حسی کا مظاہرہ کیا گیا تو جموں و کشمیر کے عوام کا خدا ہی حافظ ہے۔
دونوں لیڈران نے انتظامیہ سے اپیل کی کہ وہ کاغذی گھوڑے دوڑانے کے بجائے وقت رہتے کورونا وائرس کی دوسری لہر کو قابو کرنے اور مستقبل میں درپیش حالات سے نمٹنے کے لئے تیار رہنے کے لئے جنگی بنیادوں پر اقدامات اٹھائیں۔
اراکین پارلیمان نے عوام سے بھی اپیل کی کہ وہ کورونا وائرس کے پھیلاﺅ کا سبب نہ بنائے اور تمام احتیاطی تدابیر اور رہنما خطوط پر عمل کریں اور ماسک پہننے اور سماجی دوری بنائے رکھنے سے اجتناب نہ کریں۔
