شہر پونچھ کے زیر انتظام انعامی تقریب کا انعقاد
سید نیاز شاہ
پونچھ ؍؍حضرت علامہ انور شاہ کشمیری اسلامک انٹرنیشنل اکیڈمی شہر پونچھ کے زیر انتظام سیرتی کوئز مقابلہ برائے ضلع پونچھ اور اکیڈمی کے ننھے طلبہ وطالبات کی سال گزشتہ اور امسال امتحانات میں نمایاں کامیابی پر اہم اور مختصر انعامی تقریب کا انعقاد کیا گیا ۔جس کی صدارت سجاد احمد خان سابق ڈپٹی کمشنر پونچھ و کمشنر سکریٹری سوشل ویلفیئر نے کی؛ پروگرام کا آغاز ہاکیہ کے ننھے طلبہ وطالبات کی تلاوت سے ہوا جس کا انگریزی، اردو، ہندی، پہاڑی، گوجری اور کشمیری میں ترجمہ کیا گیا۔ جب کہ نعت اور تقریر کی سعادت منتخب طلبہ وطالبات نے حاصل کی ۔اس موقع پر صدر محترم سجاد احمد خان سابق ڈی ڈی سی پونچھ، مہمانانِ محترمین ایڈیشنل ڈپٹی کمشنر پونچھ ڈاکٹر بشارت حسین انقلابی، ایڈیشنل ایس پی خالد امین، ڈی ایس پی عظیم قریشی، ڈی ایس پی ہیڈکوارٹر محمد نواز، مقصود احمد بانی و چیئرمین نظامیہ ایجوکیشن نئی دہلی، محمد تاج میر، پروفیسر ڈاکٹر شمیم بانڈے، پروفیسر خلیل احمد ریشی، الحاج بشیر احمد خاکی، جمیل احمد کوہلی بی ڈی سی چیئرمین، پروفیسر ڈاکٹر سرفراز میر، ڈاکٹر فاروق احمد میر اور دیگر مقررین نے اپنے گراں قدر تاثرات کا اظہار کرتے ہوئے ہاکیہ کی تعلیمی خدمات کو سراہا؛ صدر محترم نے ہاکیہ اور جامعہ کی خدمات کو دیکھ کر دعاؤں سے نوازا جب کہ اس موقع پر سال گزشتہ اور امسال پری نرسری تا تھرڈ اول تا سوم پوزیشن حاصل کرنے والے خوش نصیب طلبہ وطالبات کو ایک لاکھ روپے کے نقد انعامات سے نوازا گیا؛ تقریب کے اخیر میں سیرتی کوئز مقابلہ برائے ضلع پونچھ کے اول تا ششم پوزیشن حاصل کرنے والے خوش نصیب مساہمین ومساہمات( اولمحمد آصف بن محمد اسلم ننگالی تحصیل حویلی پونچھ، دوم محمد سعد بن محمد اسلم ڈینگلہ تحصیل حویلی ضلع پونچھ،سوم خدیجہ تبسم دختر عبدالرحمان ،چکھڑی بن تحصیل منڈی ضلع پونچھ چہارم عبدالمتین بن عبدالقیوم ہاڑی تحصیل سرنکوٹ ضلع پونچھ ،پنجم مولانا ریاض احمد ، میرمولانا مہتاب الدین چھیلہ ڈھانگری تحصیل منڈی ضلع پونچھ ششم مشتاق احمد بن محمد تاج ملک اڑائی تحصیل منڈی ضلع پونچھ) کو بھی ایک لاکھ روپے کے نقد انعامات سے نوازا گیا – اس پر وقار اور سعید موقع پر درجہ سوم سے چہارم میں ترقی کرنے والے تمام طلبہ وطالبات کی حفظ قرآن کی بسم اللہ بھی کی گئی – اس موقع پر حضرت علامہ انور شاہ کشمیری اسلامک انٹرنیشنل اکیڈمی شہر پونچھ ایسے تمام خوش نصیب طلبہ وطالبات کو ان کے والدین سمیت مبارک باد پیش کرتی ہے جن کے بچوں اور بچیوں کا اسکولی تعلیم کے ساتھ ساتھ باضابطہ حفظ شروع کیا گیا، جب کہ اس موقع پر اکیڈمی کی جانب سے اعلان کیا گیا کہ اکیڈمی کی آٹھویں کلاس تک سفر طے کرنے والے طلبہ وطالبات میں سے جو چھ خوش نصیب طلبہ وطالبات سب سے پہلے حافظ قرآن اور ایک بیٹھک میں پورا قرآن کریم سنائیں گے انھیں عمرے پر روانہ کیا جائے گا ان شاء اللہ – اس موقع پر سیرتی کوئز مقابلہ برائے ضلع پونچھ کے نگراں انجینئر ارشاد اعظم وائس چیئرمین اکیڈمی اور کنونئیر ڈاکٹر پروفیسر سرفراز میر کو بھی گراں قدر انعامات سے نوازا گیا، واضح رہے کہ اس موقع پر طلبہ وطالبات کے والدین ووسرپرستان کی مخصوص تعداد شریک پروگرام رہی – اس نورانی مجلس کا اختتام دعا پر ہوا –
