وائس چانسلر ،بی جی ایس بی یو پروفیسر اکبر مسعود نے صدر شعبہ زولوجی ڈاکٹرعلی اصغرشاہ اور ٹیم کو مبارک باد پیش کی
لازوال ڈیسک
راجوری؍؍اعلیٰ پاور کمیٹی کے زیر نگرانی ، ملک بھر میں ایف آئی ایس ٹی گرانٹ کیلئے انتخابی عمل میں بابا غلام شاہ بادشاہ یونیورسٹی راجوری کا شعبہ زولوجی منتخب ہوا ۔اس مقابلے میں ملک بھرسے186اداروں نے حصہ لیا اور بی جی ایس بی یو ان سولہ اداروں میں سے ایک جن کو اس گرانٹ کیلئے منتخب کیا گیا تاہم جموں وکشمیر میں سے بی جی ایس بی یو واحد ادارہ ہے جو اس گرانٹ کیلئے منتخب ہوا ۔اس گرانٹ کے تحت بی جی ایس بی یو کو تین کروڑ رپئے کی گرانٹ دی جائے گی ۔وہیں اس گرانٹ سے شعبہ کو جدید ترین آلات سے آراستہ کرکے بنیادی ڈھانچے کی سہولیات کو بڑھانا ہے تاکہ اعلی معیار کی تحقیق کو فروغ دیا جاسکے۔اس سلسلے میں پروفیسر اکبر مسعود ، وائس چانسلر ، بی جی ایس بی یو نے شعبہ زولوجی کی اس عظیم کامیابی پر مسرت کا اظہار کیا۔پروفیسر اکبر مسعود نے بی جی ایس بی یونیورسٹی میں اس قابل قدر گرانٹ کو بی جی ایس بی یونیورسٹی میں درس و تدریس اور تحقیق کے معیار کی عکاسی قرار دیا۔ پروفیسر اکبر نے اس موقع پر ہیڈ شعبہ زولوجی ڈاکٹر علی اصغر شاہ اور ان کی ٹیم کو اس کامیابی کے لئے مبارک باد پیش کی جو یونیورسٹی کو کامیابی کی منزل پر لے جانے کے لئے ان کی انتھک کوششوں کا انکشاف کرتی ہے۔ موصوف نے کہاکہ یہ یونیورسٹی کا پہلا بڑا تعلیمی سنگ میل ہے۔ پروفیسر اکبر نے کہا کہ اس گرانٹ کو تدریسی اور تحقیق کے معیار کو بڑھانے کے لئے اعلی درجے کی بنیادی ڈھانچے کی سہولیات تیار کرنے میں استعمال کیا جائے گا۔ انہوں نے اسے ایک اہم کارنامہ قرار دیتے ہوئے کہا کہ اس سے بابا غلام شاہ بادشاہ یونیورسٹی میں سہولیات اور تعلیمی معیارات کی تجدید اور بہتری کے لئے بہت لمبا فاصلہ طے ہوگا۔ پروفیسر اکبر مسعود جو خود بائیو کیمسٹری اور بائیوٹیکنالوجی کے میدان میں ایک مشہور محقق ہیں نے کہا کہ وہ بی جی ایس بی یو کو قومی اور بین الاقوامی سطح پر سراہی جانے والی یونیورسٹی اور برانڈ نام کے طور پر ترقی کے لئے علمی فضلیت کی اگلی سطح تک تدریس اور تحقیق کے ماحول کو مزید فروغ دینے کے لئے پرعزم ہیں۔اس موقع پر ڈاکٹر علی اصغر شاہ ،ہیڈ شعبہ زولوجی نے کہا کہ شعبہ زولوجی کا FIST سطح 1 گرانٹ کے لئے انتخاب بی جی ایس بی وی برادری کے لئے قابل فخر لمحہ ہے۔ انہوں نے کہا کہ اس گرانٹ کا استعمال ایک جدید ترین ایس اینڈ ٹی انفراسٹرکچر کی تعمیر کے لئے کیا جائے گا جس سے بی جی ایس بی یو میں ہونے والی تحقیق کے معیار میں اضافہ ہوگا۔ ڈاکٹر شاہ نے راؤنڈ ووم اور جینومکس کے درجہ بندی کے شعبے میں ایک حیرت انگیز شراکت کی ہے اور انہیں 07 نئی جنیرا اور 60 نئی نسلوں کو دریافت کرنے کا اعزاز حاصل ہے۔ انہوں نے 40 اقسام کے ڈی این اے بارکوڈ تیار کیے ، بین الاقوامی شہرت کے جرائد میں کئی تحقیقی مضامین شائع کیے اور حکومت کی مختلف فنڈنگ ایجنسیوں سے 5 بڑے تحقیقی منصوبے مکمل کیے۔واضح رہے ڈاکٹر شاہ متعدد ایوارڈز کے وصول کنندہ رہے ہیں جن میں بی جی ایس بی یو کا آئوٹ اسٹینڈنگ محقق ایوارڈ بھی شامل ہے۔
