واشنگٹن / ریو ڈی جنیرو / نئی دہلی ، 13 مارچ ( یواین آئی) جان لیوا، مہلک ترین اورموذی عالمی وبا کورونا وائرس (کوڈ 19) کے سبب دنیا بھر میں ایک ہی دن میں 10 ہزار سے زیادہ افراد کی ہلاکت سے اموات کی مجموعی تعداد 26.38 لاکھ سے زیادہ ہوگئی ہے۔
جان ہاپکنز یونیورسٹی کے سائنس اینڈ انجینئرنگ سنٹر (سی ایس ایس ای) کے جاری کردہ تازہ ترین اعداد و شمار کے مطابق دنیا کے 192 ممالک اور خطوں میں پانچ لاکھ سے زیادہ افراد کورونا وائرس سے متاثر ہو نے کی رپورٹیں ہیں۔ اس کے ساتھ ہی دنیا میں کورونا متاثرین کی تعداد 11 کروڑ 90 لاکھ 23 ہزار 857 اور اس جان لیواموذی وبا سے 26 لاکھ 38 ہزار 887 افراد ہلاک ہوچکے ہیں۔
دنیا میں کورونا وائرس سے سب سے زیادہ اور بری طرح متاثر ممالک میں سے ایک امریکہ میں موذی وبا نے تباہی مچا رکھی ہے ، اور اس ملک میں کورونا مریضوں کی مجموعی تعداد دو کروڑ 93 لاکھ 43 ہزار 530 ہوگئی ہے جبکہ پانچ لاکھ 32 ہزار 500 افراد اپنی جانیں گنوا چکے ہیں۔
