آج شام ساڑھے 4بجے لیں گے حلف،ساتویں مرتبہ سجے گاسرپہ تاج
لازوال ڈیسک
پٹنہ؍؍ قومی جمہوری اتحاد ( این ڈی اے ) قانون ساز پارٹی کے نومنتخب لیڈر مسٹر نتیش کمار کل ساتویں مرتبہ بہار کے وزیراعلیٰ عہدے کا حلف لیں گے ۔مسٹر کما رنے گورنر پھاگو چوہان کے سامنے حکومت سازی کا دعویٰ پیش کر کے لوٹنے کے بعد یہاں نامہ نگاروں سے بات چیت میں کہاکہ این ڈی اے قانون ساز پارٹی کے لیڈر کے طور پر انہیں منتخب کئے جانے کی جانکاری انہوں نے گورنر کو دی ۔ گورنر نے انہیں حکومت سازی کی پیش کش کی ہے ۔ انہوں نے کہاکہ کل شام 4.00 سے 4.30 بجے کے درمیان گورنر ہائوس میں وہ وزیراعلیٰ عہدے کا حلف لیںگے ۔این ڈی اے لیڈر نے کہاکہ کل ان کے ساتھ کچھ و زیر بھی حلف لیںگے ۔ ان کی فہرست آج ہی یا کل صبح گورنر ہا[؟]س بھیج دی جائے گی ۔ ان سے جب یہ پوچھا گیا کہ کیا کل کابینہ کی حلف میں سبھی حلیف جماعتوں کو نمائندگی دی جائے گی اس پر انہوںنے کہاکہ چاروں جماعتوں کے لیڈران میٹنگ کر کے اس پر فیصلہ لیںگے ۔مسٹر کمار نے کہاکہ کل حلف تقریب کے بعد کابینہ کی میٹنگ ہوگی اور اس میں اسمبلی اجلاس کے متعلق فیصلہ لیا جائے گا تاکہ نومنتخب اراکین اسمبلی کو حلف دلائی جاسکے ۔این ڈی قانون ساز پارٹی کے لیڈر مسٹر کمار نے نائب وزیراعلیٰ کے متعلق پوچھے جانے پر کہاکہ اس کے بارے میں جلد ہی آپ کو پتہ چل جائے گا۔ انہوں نے کہاکہ عوام نے پھر سے کام کرنے کا موقع دیا ہے ۔ اچھے طریقے سے کام کرنا پڑے گا۔ نئی حکومت میں کہیں کوئی کمی نہیں رہے اس کی ہم لوگ کوشش کریںگے ۔مسٹر نتیش کمار کے گورنر ہائوس سے لوٹنے کے بعد وزیر دفاع راج ناتھ سنگھ کے ساتھ بی جے پی لیڈر سشیل کمار مودی بھی گورنر پھاگو چوہان سے ملاقات کر کے لوٹے ۔ مسٹر راج ناتھ سنگھ سے بھی جب نائب وزیراعلیٰ کے متعلق سوال کیا گیا تو انہوں نے کوئی بھی نام بتانے سے انکار کیا ۔ ان سے جب نامہ نگاروں نے دوبار پوچھا کہ کیا مسٹر سشیل کمار مودی ہی پھر سے نائب وزیراعلیٰ ہوںگے تب انہوں نے کہاکہ جب اس پر فیصلہ ہوگا تو پتہ چل جائے گا۔
