سونیاگاندھی نے خط لکھ کر جو بائیڈن اور ہیرس کو مبارکباد دی
یواین آئی
نئی دہلی؍؍کانگریس کی صدر سونیا گاندھی اور سابق صدر راہل گاندھی نے امریکہ میں مسٹر جو بائیڈن کو صدر اور کملا ہیرس کو نائب صدر منتخب ہونے پر مبارکباد پیش کی ہے ۔محترمہ گاندھی نے مسٹر بائیڈن کو ارسال کردہ اپنے پیغام میں کہا کہ انتخابی تشہیر کو ہندوستان کے لوگوں نے پچھلے ایک سال کے دوران نزدیکی سے دیکھا ہے اور سماجی مساوات، ہم آہنگی، عالمی ترقی کے لئے آپ کے خیالات اور نظریات ہم سے بھی وابستہ ہیں۔ امید ہے کہ ہندوستان اور امریکہ کے درمیان گزشتہ دہائی میں جو تعلقات رہے ہیں، آپ کی قیادت میں مزید مضبوط ہوں گے ۔محترمہ ہیرس کو تحریر کردہ اپنے خط میں محترمہ گاندھی نے کہا کہ آپ کی فتح امریکی آئین میں دیئے گئے اصولوں کی جیت ہے ۔ یہ جیت امریکہ کے سیاہ فام شہریوں اور وہاں رہنے والے ہندوستانیوں کی جیت ہے ۔ آپ کے منتخب ہونے سے جمہوریت اور انسانی اقدار کو مضبوطی ملے گی۔ محترمہ گاندھی نے امید ظاہر کی کہ مسٹر بائیڈن اور محترمہ کملا ہیریس کی قیادت میں امریکہ اور ہندوستان کے مابین تعلقات مزید گہرے ہوں گے اور ہمارے خطے کے ساتھ ساتھ دنیا میں بھی امن اور ترقی کو ایک نئی سمت ملے گی۔وہیں مسٹر راہل گاندھی نے کہا کہ انہیں پورا یقین ہے کہ مسٹر بائیڈن کی قیادت میں امریکہ مضبوط ہوگا۔ انہوں نے محترمہ ہیرس کو امریکہ کی پہلی خاتون نائب صدر منتخب ہونے کو فخر کی بات بتایا اور اس اعتماد کا اظہار کیا کہ ان کے دور میں ہندوستان اور امریکہ کے مابین تعلقات نئی بلندیوں حاصل کریں گے ۔
