وادی بھر میں جنگجو مخالف آپریشنز سردی کے موسم میں بھی جاری رکھے جائیں گے
یواین آئی
بارہمولہ؍؍جموں و کشمیر پولیس کے سربراہ دلباغ سنگھ نے کہا کہ شمالی کشمیر میں ملی ٹنسی کا خاتمہ قریب ہے۔ انہوں نے کہا کہ وادی بھر میں جنگجو مخالف آپریشنز سردی کے موسم میں بھی جاری رکھے جائیں گے۔پولیس سربراہ نے یہ باتیں اتوار کو یہاں ایک تقریب کے حاشیے پر نامہ نگاروں کے سوالات کا جواب دیتے ہوئے کہیں۔انہوں نے کہا: ‘یہاں پر ملی ٹنسی قابو میں ہے۔ خاتمے پر پہنچ چکی ہے۔ مجھے امید ہے کہ لوگوں کے تعاون سے ملی ٹنسی کا بہت جلد خاتمہ ہو جائے گا’۔دلباغ سنگھ نے کہا کہ وادی کشمیر میں جنگجو مخالف آپریشز پچھلے سال کی طرح اس سال بھی سردی کے موسم میں جاری رکھے جائیں گے۔ان کا مزید کہنا تھا: ‘جنگجوئوں نے پاکستان کے اشارے پر بے گناہ عام شہریوں کو نشانہ بنانا شروع کر دیا ہے۔ یہ پاکستان اور جنگجوئوں کے لئے شرمناک بات ہے۔ جنگجوئوں کی ان کارروائیوں کو کامیاب نہیں ہونے دیا جائے گا۔ ان کو منہ توڑ جواب دیا جائے گا۔ حالیہ شہری ہلاکتوں میں ملوث جنگجوئوں کی شناخت ہو چکی ہے اور ان کو ٹریک کرنے کی کوششیں کی جا رہی ہیں’۔پولیس سربراہ نے کہا کہ پاکستان نے لائن آف کنٹرول پر لانچنگ پیڈس کو گذشتہ برس سردیوں میں بھی ایکٹو رکھا تھا۔ان کا مزید کہنا تھا: ‘سردیاں ختم ہونے سے پہلے ہی جنگجوئوں کی ایک قسط بھیجی گئی تھی۔ کیرن سیکٹر کے راستے سے 31 مارچ کو پہلی قسط بھیجی گئی تھی لیکن سکیورٹی فورسز نے انہیں روکتے ہوئے پانچ اپریل کو پانچ جنگجوئوں کو ہلاک کیا تھا’۔پولیس سربراہ نے کہا کہ اس وقت بڑے پیمانے پر جنگ بندی معاہدے کی خلاف ورزیاں ہو رہی ہیں اور ان کے بقول اس کا مقصد زیادہ سے زیادہ جنگجوئوں کو سرحد کے اس پار دھکیلنا ہوتا ہے۔تاہم ان کا کہنا تھا: ‘سرحد پر سیکورٹی پوری طرح سے مضبوط ہے اور دراندازی کی کوششوں کو ناکام بنایا جا رہا ہے’۔
