عقیدت مندوں کیلئے دستیاب سہولیات کا جائزہ لیا
لازوال ڈیسک
سری نگر؍؍لیفٹیننٹ گورنر منوج سنہانے آج جھیل ڈل کے کنارے واقع تاریخی زیارت گاہ حضرت بل کا دورہ کیا اور وہاں عقیدتمندوں کے لئے دستیاب سہولیات کا جائزہ لیا۔لیفٹیننٹ گورنر نے زیارت گاہ پر حاضری دی او رجموں وکشمیر کی یونین ٹریٹری کے لئے امن ، ترقی ، خوشحالی اور یہاں کے لوگوں کے لئے خیرو عافیت کی دعا کی۔اُنہوں نے وہاں مذہبی اور روحانی قائدین کے ساتھ تبادلہ خیال کیا او راُنہیں کووِڈ۔19وَبا سے متعلق عوام میں جانکاری عام کرنے میں مؤثر کردارادا کریں۔بعد میں لیفٹیننٹ گورنر نے احاطے کے ارد گرد گھومے اور عقید تمندوں کے لئے سہولیات کا جائز ہ لیا۔پلگرمیج ریجیو نیشن اینڈ سپریچیول آگمنٹیشن ڈرائیو( پی آر اے ایس اے ڈی) کے تحت جاری کاموں کا جائزہ لیتے ہوئے لیفٹیننٹ گورنر نے متعلقہ افسروں کو سکیم کے تحت ترقیاتی کاموں میں سرعت لانے کے لئے کہا ۔انہوں نے افسروں کو عقیدتمندوں کے لئے بہترین سہولیات بہم رکھنے کی ہدایت دی۔واضح رہے زیارت گاہ حضرت بل کو حکومت ہند کی پی آر اے ایس اے ڈی سکیم کے تحت تعمیر و تجدید کی جارہی ہے ۔ لیفٹیننٹ گورنر کے مشیر بصیر احمد خان، صوبائی کمشنر کشمیر پانڈورانگ کے پولے ، آئی جی پی کشمیر وِجے کمار ،ضلع ترقیاتی کمشنر سری نگر ڈاکٹر شاہد اقبال چودھری ،ایس ایس پی سری نگر ڈاکٹر محمد حسیب مغل اور دیگر اعلیٰ اَفسران دورے کے دوران لیفٹیننٹ گورنر کے ہمراہ تھے۔
