سینڈیکیٹ کنارا بنک کی سری نگر شاخ بند
یواین آئی
سرینگر؍؍ایک ملازم کا کورونا ٹیسٹ مثبت آنے کے بعد منگل کے روز یہاں قائم سینڈیکیٹ کنارا بنک کی شاخ کو بند کر دیا گیا ہے۔سری نگر کے ایکسچینج روڈ پر قائم بنک برانچ کے مین گیٹ پر چسپاں ایک نوٹس میں کہا گیا ہے کہ ایک ملازم کا ٹیسٹ مثبت آنے کی وجہ سے بنک کو بند کر دیا گیا ہے۔نوٹس پر مزید کوئی تفصیلات نہیں دی گئی ہیں تاہم بنک ذرائع کا کہنا ہے کہ بنک کے ایک ملازم کا ٹیسٹ مثبت آنے پر باقی اسٹاف ممبران کو ٹیسٹ منفی آنے تک ہوم کورنٹائن میں جانے کو کہا گیا ہے۔دریں اثنا بنک کے متعدد صارفین کو منگل کے روز اس وقت مایوسی ہوئی جب وہ اپنے اپنے کاموں کے نپٹارے کے لئے وہاں آئے ہوئے تھے لیکن بنک بند تھا۔تاہم بنک کی اے ٹی ایم مشین کام کر رہی تھی اور صارفین کو اس مشین سے پیسے نکالتے ہوئے دیکھا گیا۔قابل ذکر ہے کہ سینڈیکیٹ بنک اور کنارا بنک کے مدغم ہونے کے بعد صرف یہی ایک برانچ کام کر رہا تھا۔
