مہلوکین کی مجموعی تعداد 8 ہوگئی،ممنوعہ مواد بشمول اسلحہ و گولہ بارود برآمد
یواین آئی
سرینگر؍؍شمالی کشمیر کے ضلع بارہمولہ کے کریری میں پیر کو جنگجوئوں کے سکیورٹی فورسز کی مشترکہ پارٹی پر حملے کے بعد طرفین کے درمیان چھڑنے والے مسلح تصادم میں منگل کو ایک اور جنگجو مارا گیا جس کے ساتھ مہلوک جنگجوئوں کی تعداد بڑھ کر تین ہوگئی ہے۔پیر کو جنگجوئوں کے حملے اور اس کے بعد علاقے میں چھڑنے والے تصادم میں پانچ سکیورٹی فورسز اہلکاروں اور دو جنگجوئوں سمیت سات افراد مارے گئے تھے۔ مہلوک سکیورٹی فورسز اہلکاروں میں سی آر پی ایف اور فوج کے دو دو اہلکار اور جموں و کشمیر پولیس کا ایک ایس پی او شامل ہیں۔ کشمیر زون پولیس نے کریری تصادم میں ایک اور جنگجو کے مارے جانے کی تصدیق کی ہے۔ اس سلسلے میں ایک ٹویٹ میں کہا گیا: ‘کریری انکوائنٹر اپڈیٹ: ایک اور جنگجو مارا گیا۔ مہلوک جنگجوئوں کی تعداد بڑھ کر تین ہوگئی۔ ممنوعہ مواد بشمول اسلحہ و گولہ بارود برآمد کیا گیا۔ تلاشی آپریشن جاری ہے’۔ فوج کی طرف سے جاری ایک مختصر بیان میں کہا گیا: ‘بارہمولہ میں ایک اور جنگجو مارا گیا جس کے ساتھ مہلوک جنگجوئوں کی تعداد تین ہوگئی۔ ان کے قبضے سے ایک اے کے رائفل اور تین پستولیں برآمد کی گئی ہیں۔ دو شدید زخمی فوجی جوان زخموں کی تاب نہ لاتے ہوئے دم توڑ گئے ہیں۔ مشترکہ آپریشن جاری ہے’۔ سرکاری ذرائع نے بتایا کہ پیر کو حملے کے بعد شروع ہونے والے جنگجو مخالف آپریشن میں منگل کو ایک اور جنگجو مارا گیا۔ انہوں نے کہا کہ مذکورہ جنگجو، جو بظاہر غیر ملکی ہے، کو مارنے کے لئے اس کے خفیہ ٹھکانے کو آئی ای ڈی سے اڑایا گیا۔پولیس نے پیر کے روز مارے گئے جنگجوئوں کی شناخت لشکر طبینہ کمانڈر برائے شمالی کشمیر سجاد احمد میر عرف حیدر عرف راجا ساکنہ براٹھ کلان سوپور اور اسی تنظیم کے دوسرے ایک جنگجو عنایت اللہ میر ساکنہ اندرگام پٹن کے بطور کی تھی۔ جنگجوئوں کے حملے میں جاں بحق ہونے والے سی آر پی ایف اہلکاروں کی شناخت کانسٹیبل لوکیش شرما اور کانسٹیبل خورشید خان ساکنان بہار اور ایس پی او کی شناخت مظفر علی ساکنہ بارہمولہ کے بطور کی گئی تھی۔
