یواین آئی
جموں؍؍ 14 ماہ قبل شمالی کشمیر کے ضلع بارہمولہ میں لائن آف کنٹرول (ایل او سی) کے حاجی پیر سیکٹر کے راستے سرحدپار سے کشمیر میں داخل ہونے والی ایک خاتون کو منگل کے روز وہاں کی انتظامیہ نے ضلع پونچھ میں چکن دا باغ کی مقام پر بھارتی فوج اور سول انتظامیہ کے حوالے کردیا۔ سرکاری ذرائع نے بتایا کہ ضلع بارہمولہ کے اوڑی سے تعلق رکھنے والی 36 سالہ شاہینہ بیگم زوجہ عبدالالطیف بٹ، جو چار بچوں کی ماں ہیں، گذشتہ برس 25 جون کو حاجی پیر سیکٹر کے راستے پاکستان زیر انتظامکشمیر میں داخل ہوئی تھیں۔ انہوں نے کہا کہ منگل کو پونچھ میں چکن دا باغ کی مقام پر ہونے والی ایک تقریب کے دوران پاکستانی فوج اور پاکستان زیر انتظام کشمیر کی انتظامیہ نے شاہینہ کو بھارتی فوج اور سول انتظامیہ کے حوالے کردیا۔ اس موقع پر سول انتظامیہ کے ایک افسر نے نامہ نگاروں کو بتایا: ‘شاہینہ بیگم نامی ایک خاتون گذشتہ برس بارہمولہ کے راستے پاکستان زیر انتظا م کشمیر میں داخل ہوگئی تھیں۔ ان کو آج پاکستان زیر انتظام کشمیر کی انتظامیہ نے بھارتی فوج اور سول انتظامیہ کے حوالے کیا’۔ایک سوال کے جواب میں ان کا کہنا تھا: ‘یہ تقریباً ایک سال اور دو ماہ بعد واپس لوٹی ہیں۔ تمام قانونی و طبی لوازمات کی ادائیگی کے بعد ہی شاہینہ کو واپس لایا گیا ہے’۔
