نئی دہلی ، یکم اگست ( یواین آئی) ملک میں کورونا وائرس (کووڈ ۔19) کے حالات دن بہ دن بدتر ہوتے جارہے ہیں اور اس کے ساتھ ہی دو دن میں ایک لاکھ سے زیادہ متاثرہ افراد کے رپورٹ ہونے کا سلسلہ جاری ہے ، ہفتہ کو اس بیماری کی زد میں آنے والوں کی تعداد 17 لاکھ سے تجاوز کرگئی۔
اسی کے ساتھ اچھی بات یہ ہے کہ وائرس سے شفایاب یونے والوں کی تعداد بھی 11 لاکھ کے قریب پہنچ چکی ہے۔
متاثرہ ریاستوں کے اعداد و شمار کے مطابق کورونا وائرس متاثرین کی تعداد اب بڑھ کر 1701489 ہوگئی ہے جبکہ صحت مند افراد کی تعداد 10 لاکھ 96 ہزار 893 تک جا پہنچی ہے۔ اب تک جان لیوا وبا سے 36،587 افراد ہلاک ہوچکے ہیں۔ اس وقت ملک بھر میں 567583 ایکٹو کیسز ہیں جن کا مختلف اسپتالوں میں علاج چل رہا ہے۔
قابل غور امر یہ ہے کہ اس سے قبل جمعرات کو بھی متاثرہ افراد کی تعداد 16 لاکھ سے تجاوز کر گئی تھی۔ اس سے صرف دو روز قبل منگل کے روز متاثرہ افراد کی تعداد 15 لاکھ جبکہ اتوار کے 14 لاکھ سے تجاوز کر گئی تھی۔
