کسی مالی یا جانی نقصان کی کوئی اطلاع نہیں
یواین آئی
جموں؍؍جموں و کشمیر کے ضلع پونچھ میں لائن آف کنٹرول پر منگل کی صبح ہندوستان ور پاکستان کی فوج کے درمیان گولہ باری کا تبادلہ ہوا تاہم کسی بھی جانب کسی جانی یا مالی نقصان کی کوئی اطلاع نہیں ہے۔ایک دفاعی ترجمان نے بتایا کہ پونچھ کے دگوار اور قصبہ سیکٹروں میں ایل او سی پر منگل کی صبح قریب ساڑھے دس بجے پاکستانی فوج نے بلا کسی اشتعال کے بھارتی چوکیوں کو نشانہ بنا کر گولہ باری شروع کی۔انہوں نے کہا کہ وہاں تعینات بھارتی فوج نے اس حملے کا بھر پور اور موثر جواب دیا تاہم فی الوقت کسی بھی جانب کسی جانی یا مالی نقصان کی کوئی اطلاع نہیں ہے۔بتادیں کہ پونچھ میں ایل او سی پر اتوار اور پیر کو بھی طرفین کے درمیان گولہ باری کا تبادلہ ہوا تھا۔قابل ذکر ہے کہ سال 2003 میں دونوں ممالک کے درمیان جنگ بندی معاہدہ طے پانے اور سال رواں کے اوائل سے پھوٹنے والے کورونا وبا کے باوجود بھی طرفین کے درمیان بین الاقوامی سرحد اور ایل او سی پر نوک جھونک کا سلسلہ تھمنے کا نام ہی نہیں لے رہا ہے جس کے باعث آر پار کی سرحدی بستیوں کے لوگوں کا جینا دو بھر ہو کے رہ گیا ہے۔سرکاری اعداد شمار کے مطابق سال رواں کے دوران اب تک سرحد پر فائرنگ یا گولہ باری کے تبادلے کے ازئد از دو ہزار واقعات رونما ہوئے ہیں جبکہ محض گذشتہ دس دنوں کے دوران جنگ بندی معاہدے کی خلاف ورزیوں کے 20 واقعات رپورٹ ہوئے ہیں۔
