یواین آئی
سرینگر؍؍کشمیر زون پولیس کے انسپکٹر جنرل وجے کمار نے کہا ہے کہ لشکر طیبہ نامی جنگجو تنظیم کے کمانڈر اشفاق رشید کی ہلاکت کے بعد اب ضلع سری نگر کا کوئی بھی باشندہ ملی ٹنٹ نہیں ہے۔بتادیں کہ سری نگر کے رنبیر گڑھ علاقے میں ہفتے کے روز ایک تصادم آرائی کے دوران لشکر طیبہ سے تعلق رکھنے والے کمانڈر اشفاق رشید سمیت دو جنگجو ہلاک ہوئے تھے۔ اشفاق رشید کا تعلق سری نگر کے سوزیٹھ علاقے سے تھا۔کشمیر زون پولیس نے اپنے آفیشل ٹویٹر ہینڈل پر آئی جی کشمیر وجے کمار کے حوالے سے کہا ہے: ‘لشکر طیبہ سے وابستہ اشفاق رشید خان کی گذشتہ روز ہلاکت کے بعد ضلع سری نگر کا کوئی بھی باشندہ اب ملی ٹنٹ تنظیموں کے ساتھ وابستہ نہیں ہے’۔تاہم پولیس کے اس دعوے کے بعد لوگوں نے رواں برس 13 جون کو وسطی ضلع گاندربل کے نارہ ناگ کنگن میں ٹریکنگ کے دوران لاپتہ ہونے والے جواں سال پی ایچ ڈی سکالر ہلال احمد ڈار کے بارے میں سوالات کھڑے کئے ہیں۔جموں وکشمیر پولیس کے سربراہ دل باغ سنگھ اور آئی جی پی وجے کمار نے 23 جون کو سری نگر میں نامہ نگاروں کو بتایا تھا کہ سری نگر کے مضافاتی علاقے بمنہ سے تعلق رکھنے والے مذکورہ پی ایچ ڈی سکالر نے حزب المجاہدین کی صفوں میں شمولیت اختیار کی ہے لیکن پولیس کا اب کہنا ہے کہ سری نگر کا کوئی باشندہ جنگجو نہیں ہے۔ قابل ذکر ہے کہ سال رواں کے دوران مختلف تصادم آرائیوں کے دوران اب تک 138 جنگجو مارے گئے ہیں جن میں سے بعض اعلیٰ کمانڈر بھی شامل ہیں۔
