ہندوستان کی قیادت لیہ واقع 14 ویں کور کے کمانڈر لیفٹننٹ جنرل ہریندر سنگھ کریں گے
لازوال ڈیسک
نئی دہلی؍؍مشرقی لداخ سیکٹر میں حقیقی کنٹرول لائن پر گزشتہ ایک مہا سے جاری تعطل کو دور کرنے کے لئے ہند اور چین کے سینئر فوجی افسران کے درمیان سنیچر کو پہلی اعلی سطح میٹنگ ہوگی۔حقیقی کنٹرول لائن پر خاص طور پر تین جگہوں پر دونوں فوجوں کے مابین تعطل ہے اور گزشتہ ایک مہینے سے دونوں نے وہاں اچھی خاصی تعداد میں فوج جمع کررکھی ہے۔لیفٹننٹ جنرل سطح کے افسران کی یہ میٹنگ چین کے چوشول مولڈو واقع بارڈر پرسنل میٹنگ پوائنٹ پر ہوگی، جو اس طرح کی میٹنگوں کے لئے لداخ میں مقرر دو مراکز میں سے ایک ہے۔ میٹنگ میں ہندوستان کی قیادت لیہ واقع 14 ویں کور کے کمانڈر لیفٹننٹ جنرل ہریندر سنگھ کریں گے جبکہ چین کی جانب سے ان کے ہم منصب فوجی افسر بات چیت کی میز پر ہوں گے۔منگل کو فوج کی 3 ڈویڑن کے سربراہ جو میجر جنرل رینک کے افسر ہیں، انہوں نے اپنے چینی ہم منصب کے ساتھ اس معاملے پر بات چیت کی تھی لیکن یہ بات چیت بے نتیجہ رہی۔ اس کے بعد جمعہ کو اعلی سطح میٹنگ کا فیصلہ کیا گیا۔ اس کے علاوہ بھی دونوں فریقین کے درمیان مختلف سطح کے افسران کی تقریباً 8 میٹنگیں ہوچکی ہیں۔
