کرونا وائرس سے متاثروں کے صحت مند ہونے میں مسلسل اضافہ، ریکوری ریٹ 25.19 فیصد
یواین آئی
نئی دہلی؍؍ملک میں کرونا وائرس ’کووڈ۔19‘ انفیکشن سے ٹھیک ہونے کی شرح میں مسلسل اضافہ ہورہا ہے اور اس وقت یہ بڑھ کر 25.19 فیصد ہوگیا ہے جوایک مثبت اشارہ ہے۔ گزشتہ چوبیس گھنٹوں میں کرونا سے متاثر630 لوگ صحت مند ہونے کے ساتھ ایسے لوگوں کی تعداد بڑھ کر 8324 ہوگئی ہے۔گزشتہ تین دنوں میں ملک میں کرونا وائرس سے متاثر ہونے کے معاملے دوگنے ہونے کی شرح بڑھ کر 11.3 دن ہوگئی ہے جو کروناوائرس کے انفیکشن کو قابو میں کرنے کے مرکزی حکومت کی کوششوں کو دکھاتاہے اور کرونا وائرس سے مرنے والوں کی عالمی اوسط سات فیصد ہے۔ یہ ہندوستان میں محض 3.2 فیصد ہے۔واضح رہے کہ لاک ڈاؤن سے پہلے ملک میں کرونا وائرس کے متاثریں کے دوگنا ہونے کی شرح 3.2 تھی۔وزارت صحت کے ترجمان لو اگروال نے جمعرات کو یہاں نامہ نگاروں کی کانفرنس میں بتایا کہ چودہ دن پہلے ملک میں کرونا مریضوں کے ٹھیک ہونے کا اعداد وشمار 13.06فیصد تھا جو اب بڑھ کر 25.19 ہوگیا ہے۔ اس کے علاوہ ملک میں کرونا وائرس کے انفیکشن سے مرنے والے مریضوں کی تعداد 3.2 فیصد ہے جس میں سے 65 فیصد مرد اور 35 فیصد خواتین کی موت ہوئی ہے۔ ان میں سے 78 فیصد موتیں موربیٹی کی وجہ سے ہوئی ہے، ان مریضوں میں پہلے سے ہی دل، گردے، شوگر، ہائی بلڈ پریشر اور استھما جیسی پریشانیاں تھیں۔گجرات چوبیس گھنٹوں کے دوران 308 نئے معاملے سامنے آنے کے ساتھ متاثروں کی تعداد کے معاملے کی فہرست میں دوسرے مقام پر بنا ہوا ہے۔ گجرات میں متاثروں کی مجموعی تعداد 4082 ہوگئی ہے اور 16 مزید افراد کی موت کے بعد مرنے والوں کی تعداد بڑھ کر 197 ہوگئی ہے۔ریاست میں اب تک 527 صحتیاب ہوئے ہیں۔اس کے بعد ملک کی قومی راجدھانی دہلی ہے جہاں گزشتہ چوبیس گھنٹوں میں 125 نئے معاملے درج کئے جانے کی وجہ سے اب تک مجموعی طور سے 3439 لوگ اس وبا سے متاثر ہوئے ہیں اور اسی دوران مرنے والوں کی تعداد 56 برقرار ہے۔ راجدھانی میں مجموعی طور سے 1092 مریضوں کو علاج کے بعد اسپتال سے چھٹی دے دی گئی ہے۔مدھیہ پردیش میں گزشتہ چوبیس گھنٹوں میں متاثروں کے 99 نئے معاملے سامنے آئے جس سے متاثروں کی تعداد 2660 ہوگئی اور مرنے والوں کی تعداد دو بڑھ کر 130 ہوگئی ہے۔ریاست میں اب تک 461 افراد صحتیاب ہوئے ہیں۔راجستھان میں گزشتہ چوبیس گھنٹوں کے دوران 74 نئے معاملے سامنے آئے ہیں اور ان کا اعدادوشمار بڑھ کر 2438 ہوگیا ہے۔ ریاست میں اس دوران مرنیوالوں کی تعداد بڑھ کر 51 ہوگئی ہے۔ریاست میں 768 مریض صحتیاب ہوئے ہیں۔جنوبی ہندوستانی ریاست تمل ناڈو میں 104 نئے معاملے سامنے آئے ہیں اور متاثر مریضوں کی تعداد بڑھ کر 2162 ہوگئی ہے اور ریاست میں مرنے والوں کی تعداد دو بڑھ کر 27 ہوگئی ہے۔ریاست میں اب تک 1210 صحتیاب ہوئے ہیں۔ملک کی سب سے بڑی ریاست اترپردیش میں کورونا سے 2203 لوگ متاثر ہوئے ہیں اور 39 لوگوں کی موت ہوئی ہے۔ وہیں 513 مریضوں کو علاج کے بعد اسپتال سے چھٹی دے دی گئی ہے۔آندھرا پردیش میں 1403 اور کرناٹک میں 557 لوگ متاثر ہیں ا ور ان ریاستوں میں بالترتیب 31 اور 21 لوگوں کی موت ہوئی ہے۔جنوبی ریاست تلنگانہ میں متاثروں کی مجموعی تعداد 1012 ہوگئی ہے۔یہاں مرنے والوں کی تعداد 26 برقرارہے۔ کیرالہ میں 496 لوگ متاثر ہوئے ہیں اور چار لوگوں کی موت ہوچکی ہے۔مرکز کے زیر انتظام ریاست جموں وکشمیر میں متاثروں کی تعداد 581 ہے اور آٹھ لوگوں کی اب تک موت ہوچکی ہے۔اس کے علاوہ ، مغربی بنگال میں 22، پنجاب میں 19، ہریانہ اور جھارکھنڈ میں تین ، بہار میں دو اور میگھالیہ ، اڈیشہ ، ہماچل پردیش اور آسام میں ایک ایک شخص ہلاک ہوا ہے۔
