ہم تجارتی ساتھیوں کو مدد کرنے میں کوئی کسر نہیں چھوڑیں گے:جموں وکشمیربینک
لازوال ڈیسک
سرینگر؍؍کووڈ۔19 وباء سے پیدا شد ہ مشکلات پر قابو پانے کیلئے ایک وسیع حکمتِ عملی کو مرتب دینے اور اس حوالے سے مقامی کاروباریوں کے تاثرات و تجاویز لینے کی غرض سے جموں و کشمیر بینک کی نو تشکیل ایکزیکٹیو لیول کمیٹی سرینگر اور جموں میں دو الگ الگ میٹنگوں میں مختلف تجارتی انجمنوں سے ملاقی ہوئی ۔ یہ آپسی ملاقاتیں بینک کی بورڈ آف ڈائریکٹرس کی ہدایات پر منعقد کی جارہی ہیں جسکی سر براہی بینک کے چیئرمین و منیجنگ ڈایئریکٹر راجیش کمار چھبر کر رہے ہیں۔ بینک کے کارپوریٹ آفس سرینگر میں منعقدمیٹنگ کی صدارت بینک کے ایکزیکٹیو پریزیڈنٹ ارون گنڈوترا نے کی جنکے ہمراہ وائس پریزیڈنٹ فیاض احمد زرگر، منظور حسین، پیر مسعود چستی اور اسسٹنٹ وائس پریزیڈنٹ ریاض احمد بھی تھے۔ سرینگر میں PHDچیمبر آف کامرس اینڈ انڈسٹریز کے چیئرمین بلدیو سنگھ رینہ کی قیادت میں کئی اہم امورات پر تبادلہ خیال کیاگیا۔ تجارتی وفد کے دیگر اراکین میں شامل تھے شوکت چودھری، بلال احمد کاؤسہ، جان محمد کول، شاہ جہاں اور اقبال فیاض جان۔ اسکے علاوہ کشمیر انڈسٹرئل ریویئول اینڈ ڈیولپمنٹ فورم کے نمائندے بھی الگ سے ایکزیکٹیو پریزیڈنٹ سے ملاقی ہوئے۔جموں کے زونل آفس میں منعقد میٹنگ کی صدارت ایکزیکٹیو پریزیڈنٹ سنیل گپتا نے کہ جہاں چیمبر آف ٹریڈرس فیڈریشن، جموں فروٹ ایسو سی ایشن، ٹورزم فیڈریشن جموں اور ہوٹل اینڈ ریسٹورنٹ ایسو سی ایشن کٹرا کے نمائندوں نے شرکت کی۔اس میٹنگ میں بینک کے وائس پریزیڈنٹ آنند پال سنگھ، نارجے گُپتا، اور سنیت کمار بھی شامل تھے۔ چیمبر آف ٹریڈرس فیڈریشن کے صدر نیرج آنند اپنے باقی اراکین رمن گپتا، شیو کمار گپتا، دنیش گپتا، اجے گپتا، پراگ ابرال اور راجیش گپتا کے ہمراہ میٹنگ میں شامل تھے۔ ٹورزم فیڈریشن کی طرف سے رمن سوری، وکاس گپتا، بی بی کوتوال اور سدھارتھ چودھری شامل تھے۔دونوں وفود نے بینک کے اس اقدام کی تعریف کی جسکے تحت موجودہ کورونا وائرس اثرات سے نمٹنے کیلئے ایک ایکزیکٹیو لیول کمیٹی تشکیل دی گئی ہے اور کہا کہ جموں و کشمیر میں اگست 2019سے تجارتی و کاروباری صنعت کافی متاثر ہوئی ہے اور موجودہ تناظر میں بھی بینک ایک موثر حکمت عملی بنانے کے واسطے پیش رفت کر رہا ہے۔ میٹنگوں میں تجارتی وفود نے مانگ کی کہ ورکنگ کپیٹل سہولیتی قرضوں کے سود پر چھ مہینوں کیلئے چھوٹ دیدی جائے اور دس فیصد کے بجائے پچیس فیصد اضافی فنڈس واگزار کئے جائیں جس میں ایک سال کا ماریٹورئم ہو۔ وفود نے مانگ کی کہ مدھرا لونز کو دس لاکھ سے بڑھا کر پچیس لاکھ روپے کر دیا جائے۔ اسی طرز کی مانگیں ٹورزم صنعت سے وابستہ اراکین نے بھی رکھیں جسمیں ایک سال تک سود میں چھوٹ اور بغیر سود ورکنگ کپیٹل کی فراہمی جیسی مانگ شامل تھی۔ وفود نے بینک قیادت سے یہ درخواست یہ مانگیں بینکنگ ضوابط سے پرے ہوسکتے ہیں لیکن آر بی آئی اور دیگر متعلقہ حکام تک انکو پہنچانا وقت کی اہم ضرورت ہے اور ہماری ساری امیدیں جے اینڈ کے بینک کے ساتھ جڑیں ہوئی ہیں۔ ردِ عمل کے بطور بینک کے ایکزیکٹیو پریزیڈنٹ نے کمیٹی کی طرف سے اس بات کا اعتراف کیا کہ جموں و کشمیر میں کاروباریوں کو مختلف مرحلوں پر بھاری خمیازہ اُ ٹھانا پڑا لیکن ہر مرحلے پر جموں و کشمیر بینک سے انکا بھر پورا ساتھ دیا ۔ اسی طرح ایکزیکٹیو پریزیڈنٹ ارون گنڈوترا نے وفد کے تمام اراکین کو یقین دلایا کہ ہم اپنی طرح سے اپنے تجارتی ساتھیوں کو مدد کرنے میں کوئی کسر نہیں چھوڑیں گے۔ وفود کو باور کرایا گیا کہ بینک کے سربراہ موجودہ حالات میں ہر روز جائزی لے رہے ہیں تاکہ ایک ٹھوس حکمت عملی مرتب کی جائے جو بینک اور کاروباریوں دونوںکیلئے مفید ثابت ہوسکے۔
