نئی دہلی،24اپریل(یواین آئی)وزیر دفاع راج ناتھ سنگھ نے آج یہاں فوج کے چیف کمانڈروں کےساتھ افواج کی آپریشنل تیاریوں اور کورونا کی وبا سے نمٹنے میں مسلح افواج کے ذریعہ دئے جارہے تعاون کا جائزہ لیا۔
ویڈیو کانفرنس کے ذریعہ سے ہوئی میٹنگ میں تینوں افواج کے سربراہوں او رملک کے مختلف حصوں میں واقع فوجی کمانوں کے چیف سربراہوں نے حصہ لیا۔
میٹنگ میں افواج کے چیف کمانڈروں کے ساتھ موجودہ وقت کے چیلنجوں کے ضمن میں فوجی آپریشن کی تیاریوں پر تفصیل سے بحث کی گئی۔کمانڈروں نے مسٹر سنگھ کو کورونا کی وبا کی وجہ سے نافذ لاک ڈاؤن کے پیش نظر پیدا حالات میں فوجی سرگرمیوں ،مہموں اور تیاریوں سے مطلع کرایا۔مسٹر سنگھ نے کمانڈروں سے کہا کہ ان خراب حالات میں بھی فوجی تیاریوں میں کسی طرح کی کوتاہی نہ برتی جائے اور محدود وسائل کا استعمال کرتے ہوئے سبھی ممکن قدم اٹھائے جائیں۔انہوں نے کہا کہ اس دوران مکمل لاک ڈاؤن کے سلسلے میں جاری سماجی دوری جیسی ہدایات کا بھی خیال رکھا جائے۔
وزیر دفاع نے کورونا کی وبا کے خلاف چلائی جارہی ملک گیر مہم میں تینوں افواج کے تعاون کا بھی جائزہ لیا۔تینوں افواج کے کمانڈروں نے اس سلسلے میں ان کے ذریعہ اٹھائے گئے اقدامات اور کی اطلاع دی۔وزیر دفاع نے افواج سے اس مہم میں اپنا ہرممکن تعاون دینے کو کہا۔مسٹر سنگھ نے ان سے کورونا کے خلاف جنگ میں طبی اہلکاروں کےلئے ضروری آلات کو بنانے کےلئے جنگی سطح پر قدم اٹھانے کو کہا۔
مسٹر سنگھ کے علاوہ میٹنگ میں دفاعی سکریٹری اجے کمار،چیف آف ڈفینس اسٹاف جنرل بیپن راوت،بحریہ کے سربراہ ایڈمیرل کرم بیر سنگھ،فصائیہ کے چیف آر کے ایس بھیدوریا اور بری فوج کے سربراہ منوج مکند نرونے اور سینئر افسروں نے حصہ لیا۔ملک بھر میں تینوں افواج کی مختلف کمانوں کے چیف کمانڈروں نے بھی اپنے اپنے خیالات کا اظہار کیا۔
