میدانی علاقوں میں بارش اور پہاڑی علاقوں میں کہیں کہیں ہلکی برف باری
یواین آئی
سرینگر؍؍وادی کشمیر کے میدانی علاقوں میں جہاں جمعہ کی صبح سے شروع ہونے والی رک رک کر بارش کا سلسلہ ہفتہ کے روز بھی جاری رہا وہیں پہاڑی علاقوں میں کہیں کہیں ہلکی برف باری بھی ہوئی ہے جس کے نتیجے میں سردی میں قدرے اضافہ اور لاک ڈاؤن مزید سنگین ہوا ہے۔ادھر محکمہ موسمیات نے وادی میں اتوار سے موسم بہتر ہونے کی پیش گوئی ہے۔ متعلقہ محکمہ ایک عہدیدار نے بتایا کہ وادی میں اتوار سے موسم میں بہتری واقع ہونے کی توقع ہے اور بعد ازاں 23 اپریل تک موسم خشک رہنے کی امید ہے۔وادی کو ملک کے دوسرے حصوں کے ساتھ جوڑنے والی سری نگر- جموں قومی شاہراہ ہفتے کو مسلسل دوسرے روز بھی گاڑیوں کی نقل وحمل کے لئے بند رہی۔ہائی ذرائع نے بتایا کہ شاہراہ پر کئی مقامات بشمول بانہال رام بن کے حصے میں موسلادھار بارشوں کی وجہ سے بھاری بھرکم مٹی کے تودے گر آئے ہیں جن سے شاہراہ بند ہوئی ہے۔ انہوں نے مزید کہا کہ شاہراہ کو صاف کرنے کا کام جاری ہے لیکن لگاتار بارشیں رکاوٹیں پیدا کررہی ہیں۔وادی میں ہفتہ کے روز بھی سہ پہر تک رک رک کر بارشوں کا سلسلہ جاری رہا جس کے باعث سردیوں میں قدرے اضافہ ہوا اور لاک ڈاؤن بھی مزید سنگین ہوا ہے کیونکہ بارشوں کی وجہ سے لوگ گھروں میں ہی کانگڑیاں لئے بیٹھے رہے۔لوگوں نے ایک بار پھر ماہ اپریل کے آخری پندرواڑہ میں بھی روایتی پھیرن اور دیگر قدرے گرم ملبوسات زیب تن کئے ہیں۔محکمہ موسمیات کے ایک ترجمان کے مطابق سری نگر میں گذشتہ رات کم سے کم درجہ حرارت 7.4 ڈگری سینٹی گریڈ جبکہ وادی کے مشہور زمانہ سیاحتی مقامات گلمرگ اور پہلگام میں کم سے کم درجہ حرارت بالترتیب 0.1 ڈگری سینٹی گریڈ اور 5.6 ڈگری سینٹی گریڈ ریکارڈ ہوا ہے۔وادی کے سرحدی ضلع کپواڑہ میں کم سے کم درجہ حرارت 7.2 ڈگری سینٹی گریڈ ریکارڈ کیا گیا جبکہ قاضی گنڈ اور کوکرناگ میں کم سے کم درجہ حرارت بالترتیب 7.7 ڈگری سینٹی گریڈ اور 6.6 ڈگری سینٹی گریڈ ریکارڈ ہوا ہے۔
