’یہ عرصہ دراز سے محکمے کی خدمت میں محو ہیں ‘

پی ایچ ای محکمہ کے برسر احتجاج عارضی ملازمین کے مطالبات پورے کئے جائیں: تاریگامی
لازوال ڈیسک

جموں؍؍سی پی آئی (ایم) کے سینئر لیڈر محمد یوسف تاریگامی نے پبلک ہیلتھ انجینئرنگ محکمہ میں کام کرنے والے برسر احتجاج عارضی ملازمین کے ساتھ اظہار ہمدردی کرتے ہوئے جموں وکشمیر انتظامیہ سے اپیل کی ہے کہ وہ ان کے تمام جائز مطالبوں کو کسی بھی مزید تاخیر کے بغیر پورا کریں۔بتادیں کہ پی ایچ ای محکمہ میں کام کرنے والے عارضی ملازمین 7 فروری سے اپنے مطالبوں کو لے کر برسر احتجاج ہیں۔ ان کے مطالبوں میں تنخواہوں کی واگزاری اور نوکریوں کی مستقلی خاص طور پر قابل ذکر ہیں۔موصوف لیڈر نے کہا کہ یہ عارضی ملازمین عرصہ دراز سے محکمے کی خدمت میں محو ہیں لیکن بدقسمتی کی بات یہ ہے کہ ان کی خدمات کو نظر انداز کیا جارہا ہے۔انہوں نے کہا کہ ستم ظریفی کی بات یہ ہے کہ انتطامیہ احتجاجی ملازمین کے ساتھ بات چیت کے بجائے ان کے خلاف طاقت کا استعمال کررہی ہے۔تاریگامی نے کہا کہ انتظامیہ کی طرف سے کسی اہم محکمے کے ملازمین کے مسائل کو التوا میں رکھنے سے اس محکمہ کی کارگردگی متاثر ہوتی ہے جس کا براہ راست اثر عام لوگوں پر پڑتا ہے۔انہوں نے انتظامیہ بالخصوص جموں کشمیر کے لیفٹیننٹ گورنر گریش چندرا مرمو سے اپیل کی کہ وہ ان عارضی ملازمین کی طرف توجہ مبذول کرکے ان کو درپیش مسائل کو حل کریں تاکہ ان کے اہل خانہ کو مزید مشکلات سے دوچار نہ ہونا پڑے۔