کہاصرف مودی ہی ملک کو وشو گرو اوردنیا کی تیسری بڑی معیشت بنا سکتے ہیں،کٹھوعہ میں بھاجپامیں شامل ہونے والوں کا خیر مقدم کیا
لازوال ڈیسک
کٹھوعہ؍؍ بی جے پی کے سینئر لیڈر اور ممبر پارلیمنٹ (راجیہ سبھا) غلام علی کھٹانہ نے کہا ہے کہ وزیر اعظم نریندر مودی کی دور اندیش قیادت میں ملک ترقی اور خوشحالی کی راہ پر گامزن ہے۔کٹھوعہ میں بی جے پی کے دفتر میں شمولیتی تقریب سے تبادلہ خیال کرتے ہوئے کھٹانہ نے کہا کہ صرف پی ایم مودی ہی ملک کو ‘وشو گرو’ بنا سکتے ہیں اور ہماری معیشت کو بلند کر کے ہندوستان کو دنیا کی تیسری بڑی معیشت بنا سکتے ہیں۔انہوں نے مزید کہا کہ آنے والے لوک سبھا انتخابات میں بی جے پی ملک بھر سے تاریخی نشستوں کے ساتھ ایک فاتح بن کر ابھرے گی اور جموں و کشمیر میں وہ تمام پانچ سیٹوں کے ساتھ ساتھ مرکز کے زیر انتظام علاقے لداخ سے ایک سیٹ جیت لے گی۔انہوں نے کہاکہ5 اگست 2019 کو جموں و کشمیر سے آرٹیکل 370 اور 35اے کی منسوخی کے بعد دونوں جموں و کشمیر اور لداخ کے مرکز کے زیر انتظام علاقے ترقیاتی کاموں اور عوامی فلاح و بہبود کے اقدامات میں نمایاں تبدیلیاں دیکھ رہے ہیں۔ایم پی راجیہ سبھا نے مزید کہاکہ دہشت گردی کے واقعات اور دفعہ 370 اور 35اے کی منسوخی کے بعد کشمیر میں پتھراؤ کا سلسلہ اب مکمل طور پر کم ہو گیا ہے۔اس موقع پر معروف گجر رہنما سلطان علی، محمد لطیف اور شہرت علی اپنے حامیوں کے ساتھ بی جے پی میں شامل ہوئے اور ایم پی کھٹانہ نے ان کا پارٹی میں خیرمقدم کیا۔اس موقع پرنئے شامل ہونے والوں نے کہا کہ وہ جموں و کشمیر میں عوامی مرکوز قیادت کو مضبوط کرنے کے لیے بی جے پی میں شامل ہوئے۔وہیںایم پی راجیہ سبھا نے کہا کہ جموں و کشمیر میں بی جے پی نے گجروں، بکروالوں، گدیوں، سپیوں اور دیگر قبائلی برادریوں کی ترقی کے لیے تاریخی پیش رفت کی ہے۔انہوں نے مزید کہاکہ پہلے کی سیاسی پارٹیاں جیسے این سی، پی ڈی پی اور کانگریس جو تقریباً سات دہائیوں تک اقتدار میں رہیں، نے قبائلی برادری کے ارکان کو بے وقوف بنایا اور انہیں صرف ووٹ بینک کے طور پر استعمال کیا۔کھٹانہ نے کہا کہ گجر برادری کے ارکان یہاں تک کہ ہندوستانی پارلیمنٹ اور ملک کے دیگر اعلیٰ عہدوں پر پہنچ چکے ہیں جو پہلے کبھی بھی این سی، پی ڈی پی اور کانگریس کے دور حکومت میں نہیں ہوا۔اس موقع پر کئی وفود نے ایم پی سے ملاقات کی اور راشن کارڈ جاری کرنے، مغربی پاکستان کے پناہ گزینوں کے لیے زمین کی الاٹمنٹ وغیرہ کا مطالبہ کیا۔
