نئی دہلی، (یواین آئی)چھتیس گڑھ کے وزیراعلی بھوپیش بگھیل نے اپنے کابینہ کے کچھ ساتھیوں اور پارٹی کے دیگر رہنماؤں کے ایک وفد کے ساتھ جمعہ کو کانگریس صدر سونیاگاندھی اور سابق صدر راہل گاندھی سے ملاقات کی اور اپنی حکومت کے کام کاج سے انہیں مطلع کرایا۔کانگریس نے اپنے سرکاری ٹویٹر پر یہ معلومات دیتے ہوئے بتایا کہ مسٹر بگھیل نے اپنے کابینہ کے چھ اراکین ،ارکان اسمبلی،میئروں اور میونسیپل کارپوریشنوں کے صدور کے ساتھ محترمہ گاندھی سے یہاں ان کی رہائش گاہ پر ملاقات کی۔سمجھا جاتاہے کہ اس ملاقات کے دوران مسٹر بگھیل نے اپنی حکومت کی ایک سال کی کامیابیوں کی تفصیلی معلومات پارٹی کی قیادت کو دی۔مسٹر بگھیل کے ساتھ محترمہ گاندھی اور مسٹر راہل گاندھی سے ملنے گئے وفد میں مسٹر بگھیل کے علاوہ پارٹی کے چھتیس گڑھ کے انچارج جنرل سکریٹری پی ایل پنیا ،اسمبلی اسپیکر ڈاکٹر چرن داس مہنت،ریاست کے وزیر داخلہ تامردھوج ساہو،کابینہ کے وزیرٹی ایس سنگھ دیو اور جے سنگھ اگروال شامل تھے ۔یواین آئی
