لازوال ڈیسک
رائے بریلی؍؍کانگریس صدر سونیا گاندھی نے اپنے پارلیمانی حلقے رائے بریلی میں جمعرات کو ضلع و شہری صدر کے ٹریننگ کیمپ میں اترپردیش میں پارٹی کی مضبوطی کے علاوہ کسانوں کے مسائل پر مرکزی و ریاستی حکومت کو گھیرنے کی حکمت عملی پر تبادلہ خیال کیا۔محترمہ گاندھی دو روزہ دورے پر بدھ کو بیٹی و جنرل سکریٹری پرینکا گاندھی واڈرا کے ساتھ یہاں پہنچی تھیں۔بھوئے مئو گیسٹ ہاوس میں انہوں نے کانگریس کے ضلع اور شہری صدر کے تربیتی کیمپ میں پارٹی کے ذمہ داروں کے ساتھ میٹنگ کی۔انہوں نے اترپردیش کی سیاسی صورتحال پر غوروخوض کیا اور تنظیم کو بوتھ سطح پر مضبوط بنانے کی حکمت عملی کے ساتھ کسانوں کے مسائل کو لے کر سرکار کے خلاف سڑک سے لے کر اسمبلی تک اور بلاک سے لے کر راجدھانی تک احتجاج کئے جانے کا خاکہ بھی طے کیا۔کانگریس لیڈر پرینکا گاندھی واڈرا نے کانگریس لیڈروں اور کارکنوں کو سب سے پہلے کسانوں کے گھر جاکر اور نکڑپروگرام کر کے ان کو درپیش مسائل و دقتوں کو سننے کا مشورہ دیا۔ دوسری جانب کسانوں کے مطالبے کی بنیاد پر بلاک،تحصیل اور ضلع سطح کے افسران کو بھی گھیرنے کی ہدایت دی۔ کانگریس صدر اورمحترمہ واڈرا نے پارٹی عہدیداروں کے ساتھ اس مشترکہ میٹنگ میں کسان تحریک کے آخری مرحلے میں راجدھانی لکھنؤ میں ایک ‘‘کسان آکروش مورچہ’’ کے ذریعہ ریاست کی حکمراں یوگی حکومت کو بھی گھیرنے کا اعلان کیا۔کانگریس کا تربیتی کیمپ 20 جنوری سے بھوئے مئو گیسٹ ہاوس میں چل رہا ہے جس میں پارٹی کے تمام ضلع وشہری صدر کو ٹریننگ دی جارہی ہے ۔تربیتی کیمپ میں نومنتخب پارٹی عہدہ داروں کو کانگریس کے نظریات،تاریخ،سیاسی حکمت عملی،ہندوستانی تہذیب وثقافت کی معلومات دی جارہی ہے ۔تربیتی کیمپ میں ضلع سطح پر تشکیل شدہ ضلع کمیٹی کی جوابدہی اور ذمہ داری بھی طے کی گئی ہے تاکہ وہ پوری مستعدی سے سیاسی حملوں کا جواب پوری مضبوطی کے ساتھ رکھ سکیں۔اس دوران ضلع اور شہری عہدیداروں کو بوتھ سطح پر منیجمنٹ اور کمیٹیوں کے تعمیر کے ساتھ ہی سوشل میڈیا کے بہتر استعمال کی بھی ٹریننگ دی گئی ہے ۔کانگریس صدر اور پرینکا گاندھی رائے بریلی میں اپنا دوروزہ دورہ مکمل کرنے کے بعد امیٹھی کے لئے روانہ ہوگئیں ۔امیٹھی میں ایک سڑک حادثے میں پانچ افراد کی موت ہوگئی تھی۔
