کیا آپ کو اپنے کئے پر شرم نہیں آتی؟
یواین آئی
لدھیانہ؍؍کانگریس لیڈر پرینکا گاندھی سے اترپردیش میں پولس کی مبینہ بدسلوکی پر پنجاب کے وزیراعلی کیپٹن امریندر سنگھ نے اترپردیش کے وزیراعلی یوگی آدتیہ ناتھ سے پوچھا ‘‘کیا آپ کو اپنے کئے پر شرم نہیں آتی یہاں شہریت ترمیمی قانون (سی اے اے ) کے خلاف ایک مارچ میں حصہ لیتے ہوئے کیپٹن امریندر سنگھ نے کہا ہے کہ اترپردیش میں پولس کا پرینکا گاندھی سے برتاؤ وزیراعلی کے علم میں لائے بغیر نہیں ہوسکتا۔انہوںنے کہا کہ کانگریس اس واقعہ کو نہیں بھولے گی اور ا س کا حساب لیا جائے گا۔انہوںنے بھارتیہ جنتا پارٹی (بی جے پی)پر آئین کے روح کو بدلنے کا الزام لگاتے ہوئے اس بات کا اعادہ کیا کہ پنجاب میں وہ سی اے اے کا نفاذ نہیں کریں گے اور لوگوں سے اپیل کی کہ اس قانون و ملک کے جمہوری ڈھانچے کو تباہ کرنے کی ان خطرناک کوششوں کی مخالفت میں متحد ہوجائیں۔انہوںنے کہاکہ کانگریس اس قانون کا پوری طاقت سے مخالفت کرے گی۔مارچ میں کانگریس کی پنجاب معاملوں کی انچارج آشا کماری، کانگریس کے ریاستی صدر سنیل جاکھڑ، پرنیت کور، منپریت سنگھ بادل، گرپریت سنگھ کانگر، بھرت بھوشن آشو، سادھو سنگھ دھرم سوت، بلبیر سنگھ سدھو اور رونیت سنگھ بٹو جیسے کانگریس لیڈران موجود تھے ۔کیپٹن امریندر سنگھ نے کہا کہ قانون کی پنجاب سمیت 16 ریاستوںمیں مخالفت ہورہی ہے اور بی جے پی اپنے منصوبوں میں کامیاب نہیں ہوگی۔انہوں نے آئین کا پریمبل پڑھا اور کہا کہ کسی کو ملک کے حقیقی ڈھانچے سے چھیڑ چھاڑ نہیں کرنے دی جائے گی۔ انہوںنے کہا کہ اقوام متحدہ نے سی اے اے کو بھیدبھاؤ والا قانون قرار دیا ہے ۔وزیراعلی نے کہا کہ ایم آئی ٹی کے طالب علموں نے بھی سی اے اے کے خلاف تجویز پاس کیا ہے ۔ انہوںنے کہا کہ جہاں ساری دنیا قانون کے اثرات کے سلسلے میں فکر مندی کا اظہار کررہی ہے ۔دہلی میں بیٹھے لوگ متکبرانہ رویہ اپنائے ہوئے ہیں اور ملک کی آواز نہیں سن رہے ہیں۔کیپٹن امریندر سنگھ نے کہا کہ گرونانک نے بھی سیکولرزم کا سبق پڑھایا تھا اور ان کے الفاظ تھے ‘ نہ کوئی ہندو، نہ کوئی مسلمان، سب رب دے بندے ’۔مارچ دریسی میدان سے ماتارانی چوک پر مہاتما گاندھی کے مجسمہ تک نکالا گیا۔
