لکھنؤ، (یو این آئی ) طویل فارمیٹ کے کرکٹ میں نئے رکن افغانستان کو کھیل کے ہر شعبہ میں پچھاڑتے ہوئے ویسٹ انڈیز نے سنگلز ٹیسٹ میچ کے تیسرے دن جمعہ کو نو وکٹ سے آسان جیت درج کی۔اٹل بہاری واجپئی اکانا اسٹیڈیم پر افغانستان کی ٹیم کے پہلی اننگز کے 187 رنز کے جواب میں ویسٹ انڈیز نے اپنی پہلی اننگز میں 277 رن بنائے جس کے جواب میں میزبان ٹیم نے کل کے اسکور سات وکٹ پر 109 رن سے آگے کھیلنا شروع کیا اور قریب آدھے گھنٹے کے کھیل میں پوری ٹیم 120 رنز بنا کر پویلین لوٹ گئی۔ جیت کے لیے ضروری 31 رن کیریبین ٹیم نے دوسری اننگز میں 6.2 اوور کے کھیل میں ایک وکٹ کے نقصان پر پورے کر لیے ۔ویسٹ انڈیز کی جیت میں بھاری بھرکم رھکیم کارنوال کا اہم تعاون رہا جنہوں نے کیریئر کی بہترین کارکردگی کا مظاہرہ کرتے ہوئے دونوں اننگز میں افغان ٹیم کے دس بلے بازوں کو پویلین کا راستہ دکھایا۔ وہ پلیئر آف دی میچ منتخب کئے گئے ۔ مڈل آرڈر کے بلے باز شمراہ بروکس (111) کی پہلی اننگز میں شاندار سنچری نے کیریبین ٹیم کی جیت کی بنیاد قائم کی۔ افغانستان کی دوسری اننگز کو سستے میں آل آؤٹ کرنے میں روسٹن چیز اور شین ہولڈر کا اہم تعاون رہا جنہوں نے کفایتی بولنگ کرتے ہوئے تین تین وکٹیں حاصل کیں۔افغانستان کی جانب سے عامر حمزہ نے ڈیبو ٹیسٹ میں ویسٹ انڈیز کی دونو ں اننگز میں گرنے والے 11 وکٹ میں سے چھ پر اپنا قبضہ جماکر سلیکٹرز کے فیصلے کو درست ثابت کیا
